நகராட்சி அலுவலகத்தை மாற்றுத்திறாளிகள் முற்றுகை

நெல்லிக்குப்பம்: நெல்லிக்குப்பம் நகராட்சி அலுவலகத்தை மாற்றுத்திறனாளிகள் முற்றுகையிட்டதால் பரபரப்பு ஏற்பட்டது. நெல்லிக்குப்பம் நகராட்சியில், எஸ்.எல்., நகரை சேர்ந்த மாற்று திறனாளி பெரோஸ்கான் கவுன்சிலராக நியமிக்கப்பட்டு பதவியேற்று நகரமன்ற கூட்டத்திலும் கலந்து கொண்டார். இந்நிலையில் இந்த பதவிக்கு மனு செய்திருந்த மாற்று திறனாளிகள் தங்கள் குடும்பத்தினருடன் நகராட்சி அலுவலகத்தை நேற்று மதியம் முற்றுகையிட்டனர். அலுவலகத்தில் கமிஷ்னர் இல்லாததால் அங்கிருந்த மற்ற அதிகாரிகள் தங்களுக்கு அதிகாரம் இல்லையென, அவர்களிடம் பேச்சுவார்த்தை நடத்தவில்லை. இதனால் மாற்று திறனாளிகள், தங்களது மூன்று சக்கர வானங்களில் நகரின் முக்கிய சாலை வழியாக நீதி கேட்டு பேரணியாக சென்றனர். அம்பேத்கார் சிலை அருகே மாலை 4:00 மணி முதல் 4:30 மணி வரை ஆர்ப்பாட்டம் நடத்தினர். தொடர்ந்து போலீசார் அறிவுறுத்தலில், கலைந்து சென்றனர். இது குறித்து அவர்கள் கூறியதாவது: வெளிமாவட்டத்தை பூர்வீகமாக கொண்ட, பதவிக்காக நெல்லிக்குப்பத்தில் பெயர் சேர்த்துள்ள பெரோஸ்கானை நியமித்துள்ளனர். அவருக்கு எங்கள் நகராட்சியில் வாக்குரிமை கூட கிடையாது. உள்ளூரை சேர்ந்தவர்களை யே நியமிக்க வேண்டும் என அரசு கூறி உள்ளது. அவரது பதவியை ரத்து செய்துவிட்டு உள்ளூரை சேர்ந்த மாற்றுத்திறனாளி ஒருவரை கவுன்சிலராக்க வேண்டும். இவ்வாறு அவர்கள் தெரிவித்தனர்.