கடலுார் மாவட்டத்தில் பள்ளி, கல்லுாரிகளுக்கு விடுமுறை சில்வர் பீச்சில் கண்காணிப்பு பணி

கடலுார்: கடலுார் மாவட்டத்தில் 'டிட்வா' புயல் காரணமாக அதிக கனமழை பெய்யும் என வானிலை ஆய்வு மையம் எச்சரிக்கை விடுத்துள்ளது. மழை மற்றும் புயல் பாதிப்பை எதிர்கொள்ள மாவட்ட நிர்வாகம் பல்வேறு முன்னெச்சரிக்கை நடவடிக்கைகளை மேற்கொண்டு வருகிறது. புயல் காரணமாக பலத்த காற்று வீசி வருவதால் மாவட்டத்தில் கடல் அலையின் சீற்றம் வழக்கத்தை விட அதிகளவில் காணப்படுகிறது. பல அடி உயரத்திற்கு அலைகள் எழும்புகின்றன. இதனால், மீனவர்களுக்கு கடலுக்கு மீன்பிடிக்க செல்ல வேண்டாம் என அறிவுறுத்தப்பட்டுள்ளது. மீனவர்கள் தங்கள் படகுகள் மற்றும் மீன்படி உபகரணங்களை கடற்கரையோரம் பாதுகாப்பாக வைத்துள்ளனர். கடலுார் சில்வர் பீச்சில் முன்னெச்சரிக்கை நடவடிக்கையாக பொதுமக்கள் செல்லாமல் இருக்க போலீசார் பேரிகார்டு வைத்து கண்காணிப்பு பணியில் ஈடுபட்டுள்ளனர். பள்ளி, கல்லுாரிகளுக்குவிடுமுறை மாவட்டத்தில் 'டிட்வா' புயல் காரணமாக பள்ளி மற்றும் கல்லுாரிகளுக்கு விடுமுறை அளித்து கலெக்டர் சிபி ஆதித்யா செந்தில்குமார் உத்தரவிட்டுள்ளார். புயல் கடலுாரை நெருங்கி வருவதால் மாவட்டத்திற்கு 'ரெட்' அலர்ட் எச்சரிக்கை விடுக்கப்பட்டுள்ளது. இதனால் பள்ளி மற்றும் கல்லுாரிகளுக்கு விடுமுறை அளிக்கப்பட்டுள்ளது. சிறப்பு வகுப்புகளும் வைக்கக்கூடாது என கலெக்டர் உத்தரவிட்டுள்ளார்.