ஆரம்ப சுகாதார நிலையம் புதிய கட்டடம் பயன்பாட்டிற்கு வருவது எப்போது?

நடுவீரப்பட்டு: நடுவீரப்பட்டு ஆரம்ப சுகாதாரநிலையம் புதிய கட்டடம் பொதுமக்கள் பயன்பாட்டிற்கு வருவது எப்போது என கேள்வி எழுந்துள்ளது. நடுவீரப்பட்டில் மேம்படுத்தப்பட்ட அரசு ஆரம்ப சுகாதாரநிலையம் உள்ளது. இந்த சுகாதாரநிலையத்தில் நடுவீரப்பட்டு, சி.என்.பாளையம், சிலம்பிநாதன்பேட்டை, குமளங்குளம், விலங்கல்பட்டு, பாலுார் உள்ளிட்ட பல பகுதியிலிருந்து தினமும் நுாற்றுக்கணக்கான பொதுமக்கள் சிகிச்சை பெற்று செல்கின்றனர். இங்கு 24 மணிநேரம் பிரசவம் பார்க்கும் வசதி உள்ளது. இந்த சுகாதாரநிலையத்தில் பிரதான கட்டடம் பழுதடைந்ததால், பொதுமருத்துவம், பல், கண், சித்தா, லேப், நோயாளிகளுக்கு கவுன்சிலிங் வழங்குதல், மருந்துகள் வழங்கும் பிரிவு உள்ளிட்ட அனைத்தும் முழுமையாக பிரசவம் பார்க்கும் கட்டடத்தில் இயங்கி வருகிறது. இதனால் சுகாதாரநிலையத்தில் இடநெருக்கடி அதிகரித்தது. இந்நிலையில், கடந்த சில மாதங்களுக்கு முன் சித்தா பிரிவுக்கு தனி கட்டடம் கட்டப்பட்டு பயன்பாட்டில் உள்ளது. மேலும் கடந்த 2024-2025 ஆண்டு 15 வது நிதிக்குழு மான்ய நிதியில் ரூ.50 லட்சம் மதிப்பில் புதிய கட்டடம் கட்டப்பட்டது. இக்கட்டடம், லேப் உள்ளிட்ட சில பிரிவுகளை தனியாக பிரித்து இட நெருக்கடியை குறைக்க கட்டப்பட்டது. இந்த புதிய கட்டடம் கட்டி முடிக்கப்பட்டு, திறக்கப்படாமல் உள்ளது. மாவட்ட நிர்வாகம் கட்டி முடிக்கப்பட்ட புதிய கட்டடத்தினை பயன்பாட்டிற்கு கொண்டு வர பொதுமக்கள் கோரிக்கை விடுத்துள்ளனர்.