வக்கீல்களும், சட்ட மாணவர்களும் அறம் சார்ந்த சேவைக்கு அறிவுறுத்தல்

தர்மபுரி வக்கீல்களும், சட்ட மாணவர்களும் அறம் சார்ந்து சேவை புரிய வேண்டும் என, தர்மபுரி நிரந்தர மக்கள் நீதிமன்ற நீதிபதி ஸ்ரீதரன் பேசினார். அரசு சட்ட கல்லுாரிகளுக்கு இடையே, மாநில அளவிலான மாதிரி நீதிமன்ற போட்டிகள், தர்மபுரி அரசு சட்டக் கல்லுாரியில் நேற்று துவங்கியது. கல்லுாரி முதல்வர் உஷா வரவேற்றார். தர்மபுரி நிரந்தர மக்கள் நீதிமன்ற நீதிபதி ஸ்ரீதரன் குத்துவிளக்கேற்றி போட்டிகளை துவக்கி வைத்து பேசியதாவது:சட்டம் பயிலும் மாணவர்கள் எதிர்காலத்தில் நீதிமன்றத்தில் எவ்வாறு வாதிட வேண்டும் என்பதற்கான பயிற்சி பெறும் பொருட்டு, இவ்வகையான மாதிரி நீதிமன்ற போட்டிகளை நடத்துவது மிகுந்த வரவேற்புக்குரியது. வக்கீல்களும், சட்ட மாணவர்களும் அறம் சார்ந்த சேவை புரிய வேண்டும். கடும் பயிற்சி, விடா முயற்சி, அறம் சார்ந்தும், நெறிமுறைகளோடும் செயல்பட்டால், தொடக்கத்தில் கடினமான சூழ்நிலை கடந்தாலும், எதிர்கால வக்கீல்களுக்கு பிரகாசமான வாழ்க்கை காத்திருக்கிறது.இவ்வாறு, அவர் பேசினார்.கல்லுாரி உதவி பேராசிரியர் லஷ்மி விஸ்வநாத் நன்றி கூறினார். மாதிரி நீதிமன்ற போட்டி ஏற்பாடுகளை பேராசிரியர்கள் சிவதாஸ், ரேகா, கண்ணப்பன், வினுபிரசாத், உடற்கல்வி இயக்குனர் ரம்யா, நுாலகர் ஸ்ருங்கா ஆகியோர் செய்திருந்தனர்.