துார்வாரியும் நோ யூஸ்: கூடுதல் நீர் தேக்க முடியாததால் தரிசான நிலங்கள்

கொடைக்கானல்: கொடைக்கானல் அருங்காட்டுகுளத்தை துார்வாரியும் கூடுதல் தண்ணீர் தேக்க முடியாத நிலையில் விவசாய பரப்பு சுருங்கி நிலங்களும் தரிசாகி உள்ளன. பூண்டி ஊராட்சி அருங்காட்டுகுளம் 15 ஏக்கரில் உள்ளது. இதன் முக்கிய நீராதாரமாக கீழ்மடை பள்ளம் உள்ளது. இக்குளம் மூலம் 1500 ஏக்கர் நிலம் பாசன வசதி பெறுகிறது. 2020 ல் குடிமராமத்து பணியில் ரூ. 50 லட்சத்தில் துார்வாரப்பட்ட நிலையில் பெயரளவில் பணிகள் நடந்ததால் முழுமையாக துார்வாரப்படவில்லை என விவசாயிகள் குற்றம்சாட்டுகின்றனர். கரையை உயர்த்தாததால் கூடுதல் தண்ணீர் தேக்க முடியாமல் கோடையில் ஆயிரம் ஏக்கர் நிலம் மட்டுமே பாசன வசதி பெறுகிறது, எஞ்சிய நிலங்கள் தரிசாக உள்ளன . காங்கிரீட் வாய்க்கால்கள் கட்டமைக்க கோரிக்கை விடுத்தும் கிடப்பில் உள்ளது. பொதுப்பணித்துறை குளத்தை துார்வாரி,கரையை உயர்த்தி கூடுதல் தண்ணீர் தேக்க நடவடிக்கை எடுக்க வேண்டும்.