படைப்புழு, காட்டுப்பன்றிகளால் மக்காச்சோள சாகுபடியில் பாதிப்பு

கன்னிவாடி, நவ. 29- மேற்கு தொடர்ச்சி மலை அடிவார கிராமங்களில் காட்டுப்பன்றி படைப்புழுக்களின் தாக்கத்தால் மக்காச்சோள சாகுபடியில் பாதிப்பு அதிகரித்துள்ளது. இப்பகுதியில் வெங்காயம், பயறுவகை, கொத்தமல்லி, சூரியகாந்தி, எள், பருத்தி சாகுபடி குறைந்துள்ளது. சில ஆண்டுகளாக மக்காச்சோள சாகுபடி பரப்பு அதிகரிக்க துவங்கியது. 2 ஆண்டுகளாக மக்காச்சோள சாகுபடியில் மகசூல் கிடைத்தும் விலை குறைவாக இருந்தது. 3 ஆண்டுகளாக படைப்புழு தாக்குதல் பாதிப்பை ஏற்படுத்தி வருகின்றன. கரிசல்பட்டி, குட்டத்துப்பட்டி, வட்டப்பாறை, கசவனம்பட்டி, வண்ணம்பட்டி வீரக்கல், எஸ்.பாறைப்பட்டி, சுரக்காய்பட்டி பகுதியில் பரவலாக படைப்புழுக்களின் தாக்கம் பெருமளவு சாகுபடியை சேதப்படுத்தி உள்ளது. எஞ்சியவற்றை காட்டுப்பன்றிகள் சூறையாடி வருகின்றன. விவசாயிகள் சிலர் கூறுகையில், 'பால் பிடிக்கும் பருவத்தில் பெய்யும் மழை சொற்ப ஆதாரத்தையும் வீணாக்கி வருகிறது. படைப்புழு, காட்டுப்பன்றி பிரச்னை மக்காச்சோள சாகுபடியை நிலை குலைய செய்துள்ளன. அடுத்தடுத்து மருந்து தெளித்தல், களை அகற்றல், மழை சவால்களை எதிர்கொண்ட சூழலில் கடன் பெற்று விவசாயம் மேற்கொண்ட விவசாயிகள் செய்வதறியாது கலக்கத்தில் உள்ளனர். வேளாண் அதிகாரிகளும் கள ஆய்வு ஆலோசனை வழங்கலை தவிர்க்கின்றனர். சந்திக்க முடியாததால் விவசாயிகள் அதிருப்தியில் உள்ளனர் என்றனர்.