இதுவும் நல்ல யோசனைதான்: வறண்ட கண்மாய்களுக்கு வைகை நீர்: கிளைக் கால்வாய்களை அமைக்கலாமே

மாவட்டம் மழை மறைவு பிரதேசமாக இருப்பதால் வடகிழக்கு பருவமழை மலைப் பிரதேசங்களைத் தவிர சமவெளிப் பகுதிகளில் போதுமான அளவில் பெய்வதில்லை. கடந்த காலங்களில் பெய்த மழை அளவை கணக்கிட்டால் ஆண்டுக்கு ஆண்டு மழையின் அளவு குறைந்து கொண்டே வருகிறது. இதனால் கண்மாய்கள் வறண்டு போகின்றன. நிலத்தடி நீர்மட்டம் வெகுவாக குறைந்து விடுகிறது. குடிநீருக்கு பற்றாக்குறை ஏற்படும் நிலை தான் உள்ளது. இந்த ஆண்டும் மழைப்பொழிவு 40 சதவீதம் குறைந்ததால் மருதாநதி, மஞ்சளாறு, குடகனாறு, பாலாறு பொருந்தலாறு உள்ளிட்ட அணைகள் நிரம்பவில்லை. இதனால் அணைகளில் இருந்து நீர் வெளியேற்றாததால் கண்மாய்கள் வறண்டு உள்ளன. அடுத்த ஆண்டு வரும் கோடை காலத்தில் இதன் தாக்கம் பெரிதாக தெரியும் என விவசாயிகள் கவலையில் உள்ளனர். இவ்வாறு மழை பொய்க்கும் காலங்களில் அதிக நீர்வரத்தை கொடுக்கும் வைகை அணை, பெரியார் கால்வாயில் இருந்து கிளை வாய்க்கால்கள் அமைத்து பல்வேறு பகுதிகளுக்கு நீர் கொண்டு செல்ல வேண்டுமென விவசாயிகள் கோரி வருகின்றனர்.