நினைவு சின்னங்களாகி வரும் வணிக வளாகங்கள் மாநகராட்சி கூட்டத்தில் கவுன்சிலர் வேதனை

ஈரோடு, நஈரோடு மாநகராட்சி சாதாரண கூட்டம் மேயர் நாகரத்தினம் தலைமையில் நேற்று நடந்தது. துணைமேயர் செல்வராஜ், ஆணையர் அர்பித் ஜெயின் முன்னிலை வகித்தனர். கூட்டம் தொடங்கியவுடன் மறைந்த மாநகராட்சி கவுன்சிலர் செந்தில்குமார், கவிஞர் ஈரோடு தமிழன்பன் மற்றும் மெக்காவில் உயிரிழந்த, 41 பேருக்கு மவுன அஞ்சலி செலுத்தப்பட்டது. புதிதாக பொறுப்பேற்ற நியமன கவுன்சிலர் செந்தில்குமாருக்கு அனைவரும் வாழ்த்து தெரிவித்தனர். கூட்டத்தில் கொண்டு வரப்பட்ட, 25 தீர்மானங்களும் நிறைவேற்றப்பட்டன.கூட்டத்தில் 43 வார்டு காங்., கவுன்சிலர் சபுராமா பேசியதாவது: முத்துக்குமாரசாமி நகரில் கட்டி பத்து மாதங்களாகியும் பூங்கா, சமுதாயக்கூடம் திறக்கப்படாமல் உள்ளது. கடந்த மார்ச்சில் நடந்த சிறப்பு கூட்டத்தில், சொத்துவரி குறைப்பு தொடர்பாக தீர்மானம் நிறைவேற்றியும் நடவடிக்கை எடுக்காமல் உள்ளது. இதன் மதிப்பு என்ன? ஜீவானந்தம் வீதியில், 15 லட்சம் மதிப்பில் கட்டப்பட்ட சாக்கடை வடிகாலில் கழிவுநீர் தேங்கி வருகிறது.அ.தி.மு.க., கவுன்சிலர் ஜெகதீஸ் (31வது வார்டு) பேசியது:துாய்மை பணியாளர்களுக்கு உணவு வழங்கும் திட்டத்தில், அவர்களுக்கு வழங்கப்படும் உணவு குறித்தும், அதற்கான ஏற்பாடு, செலவீனங்கள் குறித்து விரிவாக தெளிவுபடுத்த வேண்டும். அம்மா உணவகத்தில் ஒரு ரூபாய்க்கு இட்லி விற்கும் போது, திட்டத்தில் 41 ரூபாய் மதிப்பீடு போடப்பட்டுள்ளது. இத்திட்டத்துக்கான டெண்டரை மூன்று ஆண்டாக உள்ளதை ஒரு வருடமாக மாற்ற வேண்டும்.அதிகாரிகள் அளித்த பதில்: மாநகராட்சியில், 60 வார்டுகளுக்கு, 44 இடங்களில் உணவு வழங்க ஏற்பாடு செய்யப்பட்டுள்ளது. துாய்மை பணியாளருக்கு திங்கட்கிழமை காலை ஆறு இட்லி, மெதுவடை மற்றும் சாம்பார்; செவ்வாய், 500 கிராம் ரவா கிச்சடி-சட்னி; புதன் வெண்பொங்கல், 500 கிராம்-சட்னி; வியாழன் ரவா உப்புமா-500கிராம்-சட்னி; வெள்ளி ஆறு இட்லி, மெதுவடை-சாம்பார்; சனி ரவா பொங்கல்-சாம்பார் வழங்கப்படும். இதில், 41 ரூபாய் விலை நிர்ணயம் என்பது பொருட்கள் செலவு, சமையல் கூலி, போக்குவரத்து செலவீனம் என அனைத்தும் சேர்ந்தது. டெண்டர் எடுப்பவர் ஒரு வருடம் பணியை சரியாக செய்தால் மட்டுமே அடுத்த வருடம் தொடர முடியும்.நான்காவது மண்டல தலைவர் தண்டபாணி பேசியதாவது: கனி மார்க்கெட் வணிக வளாகத்தில் குறைந்த கடைகள் மட்டுமே ஏலம் போனது. மீதி கடைகள் காலியாகவே உள்ளது. இதில் விதி மீறி, 10 அட்டை கடைகள் உருவாகி உள்ளதால் மற்ற கடைக்காரர்களுக்கு வியாபாரம் பாதிக்கிறது. இந்த கடைகளை அகற்ற கலெக்டர் உத்தரவிட்டும் நடவடிக்கை இல்லை. மாநகராட்சி வருமானத்துக்காக கட்டப்பட்ட வணிக வளாகங்கள் ஏலம் போகாமல் நினைவு சின்னமாக மாறி வருகின்றன. கவுன்சிலர்களின் கோரிக்கைக்கு மதிப்பு உள்ளதா? இல்லையா? எதை கேட்டாலும் மேலிடத்துக்கு அனுப்பியுள்ளோம் என்றால் எப்படி? அதிகாரிகளின் பதில்: கனி மார்க்கெட் வளாகத்தில் அட்டை கடைகளை அகற்ற நோட்டீஸ் கொடுக்கப்பட்டுள்ளது. 15 நாட்களுக்குள் அகற்றவில்லை என்றால் அடுத்தக்கட்ட நடவடிக்கை எடுக்கப்படும். வணிக வளாகத்தில் வியாபாரிகளின் நலனுக்காக டெபாசிட் தொகை குறைப்பு, வளாகத்தில் கூடுதல் வசதி போன்ற பல்வேறு நடவடிக்கை எடுத்துள்ளோம். கூட்டத்தில் பல்வேறு கவுன்சிலர்கள், தங்கள் வார்டு பிரச்னை, குறை குறித்து பேச, அதிகாரிகள் பதில் அளித்தனர்.அ.தி.மு.க., வெளிநடப்புகூட்டத்தில் எதிர்க்கட்சி தலைவரான, 11வது வார்டு அ.தி.மு.க., கவுன்சிலர் தங்கமுத்து பேசியதாவது: முதல்வர் மற்றும் உள்ளாட்சித்துறை அமைச்சர் கடந்த, 26ல் சோலார் பஸ் ஸ்டாண்டை திறந்து வைத்தார்கள். அப்போது மக்கள் மற்றும் கவுன்சிலர்களின் கோரிக்கையான சொத்துவரி குறைப்பை பற்றி பேசினீர்களா, இல்லையா? இது தொடர்பாக தீர்மானம் நிறைவேற்றியும் இதுவரை என்ன நடவடிக்கை எடுத்துள்ளீர்கள் என்பதை தெரியப்படுத்த வேண்டும். பிச்சைக்காரன்பள்ளம் ஓடையின் இருபுறமும் தடுப்புச்சுவர் கட்டுவதாக கூறி, ஒரு வருடமாகியும் நடவடிக்கை எடுக்கவில்லை. பாதாள சாக்கடை இணைப்புக்கான குழாய் அமைக்கும் பணியை எடுத்த ஒப்பந்ததாரர் குறித்தும், குழாய் போடுவதற்கு ஒரு அடிக்கு எவ்வளவு செலவு என்பதையும் தெரியப்படுத்த வேண்டும். அ.தி.மு.க., கவுன்சிலர் வார்டுகளில் அனைத்து பணிகளும் புறக்கணிக்கப்படுகிறது. எனவே கூட்டத்தில் இருந்து வெளிநடப்பு செய்கிறோம். இவ்வாறு பேசினார். இதை தொடர்ந்து அ.தி.மு.க., கவுன்சிலர்கள் வெளியேறினர்.