ரூ.80 கோடி நெசவுக்கூலி நிலுவை முதல்வரிடம் மனு தந்ததால் எதிர்பார்ப்பு

பெருந்துறை, தமிழ்நாடு தொடக்க கைத்தறி, விசைத்தறி நெசவாளர் சங்கங்களின் கூட்டமைப்பு தலைவர் தங்கவேல், பெருந்துறையில் நிருபர்களிடம் நேற்று கூறியதாவது:தமிழ்நாடு தொடக்க கைத்தறி விசைத்தறி கூட்டுறவு நெசவாளர் சங்கங்களின் கூட்டமைப்பின் கீழ், ஈரோடு, நாமக்கல், திருப்பூர், கோவை, மதுரை உள்ளிட்ட மாவட்டங்களில், 184 கூட்டுறவு விசைத்தறி சங்கங்கள் மூலம், தமிழக அரசின் இலவச வேட்டி, சேலைகள் கூலிக்கு நெய்து தரப்படுகிறது. கடந்த ஆண்டு அரசு நுாற்பாலை மூலம் வழங்கிய நுாலை பயன்படுத்தி, ஒரு கோடியே, 77 லட்சம் விலையில்லா வேட்டி நெய்து அரசுக்கு அனுப்பி வைக்கப்பட்டது. தர பரிசோதனையில், 13 லட்சம் வேஷ்டிகளில் பாலியஸ்டர் நுால் அதிகம் கலந்திருப்பதாக கூறி, ஓராண்டுக்கும் மேலாக கிடங்குகளில் இருப்பு வைத்துள்ளனர். இதனால் இதை நெய்த கூலி, 80 கோடி ரூபாயை நிலுவை தொகையாக நிறுத்தப்பட்டுள்ளது. இதை விடுவிக்க பலமுறை கைத்தறி துணி நுால் துறை அதிகாரிகளுக்கு கோரிக்கை விடுத்தும் பலனில்லை.அரசு கூட்டுறவு நுாற்பாலை நுாலை வாங்கித்தான் இலவச வேட்டி- சேலைகளை நெய்து தருகிறோம். அந்த நுாலில் மாறுபாடு இருந்தால், நெசவு செய்யும் தொழிலாளர்கள் எப்படி பொறுப்பேற்க முடியும். இதுகுறித்து ஈரோட்டுக்கு வந்த, முதல்வர் ஸ்டாலினிடம் கூட்டமைப்பு சார்பில் மனு அளிக்கப்பட்டுள்ளது. நிறுத்தி வைக்கப்பட்டுள்ள நெசவு கூலித்தொகையை அரசு விரைந்து வழங்கும் என எதிர்பார்த்துள்ளோம். இவ்வாறு கூறினார்.