டிட்வா புயலை எதிர்கொள்ள முன்னெச்சரிக்கை நடவடிக்கை கட்டுப்பாட்டு அறை திறப்பு

கள்ளக்குறிச்சி: மாவட்டத்தில் வடக்கிழக்கு பருவமழை டிட்வா புயலை எதிர்கொள்ளும் வகையில் அனைத்து முன்னெச்சரிக்கை நடவடிகைகளும் மேற்கொள்ளப்பட்டுள்ளதாக கலெக்டர் தெரிவித்துள்ளார். இது தொடர்பாக கலெக்டர் பிரசாந்த் விடுத்துள்ள செய்தி குறிப்பு; கள்ளக்குறிச்சி மாவட்டத்தில் வடக்கிழக்கு பருவமழை, 'டிட்வா' புயல் காரணமாக இன்று (29ம் தேதி) ஆரஞ்சு அலர்ட் விடுக்கப்பட்டுள்ளது. இதனையொட்டி முன்னெச்சரிக்கை நடவடிக்கை மேற்கொள்ளும் பொருட்டு கலெக்டர் அலுவலகத்தில், பேரிடர் காலங்களில் 24 மணி நேரமும் செயல்படும் வகையில் அனைத்து துறை அலுவலர்களை உள்ளடக்கிய அவசர கால கட்டுபாட்டு அறை அமைக்கப்பட்டுள்ளது. கட்டணமில்லா எண் 1077 மற்றும் 04151-228801 என்ற எண்ணில் மழை, வெள்ளம் மற்றும் பேரிடர்கள் குறித்து தகவல் தெரிவிக்கலாம். அனைத்து தாலுகா அலுவலகங்களிலும் சுழற்சி முறையில் அலுவலர்கள் நியமிக்கப்பட்டு 24 மணி நேரமும் இயங்கும் வகையில் கட்டுபாட்டு அறை அமைக்கப்பட்டுள்ளது. பருவ மழை காலங்களில் ஏற்படும் பேரிடர்களை கண்காணித்தும் பொருட்டு அனைத்து துறை அலுவலர்கள் இணைந்து செயல்படும் வகையில் வட்ட அளவிலான 7 துணை ஆட்சியர்களும், குறுவட்ட அளவில் 25 மண்டல தலைவர்கள் நியமிக்கப்பட்டுள்ளனர். மேலும், 256 தற்காலிக நிவாரண முகாம்கள், 1080 மீட்பு உபகரணங்கள் என பேரிடர் காலங்களை எதிர்கொள்ள தயார் நிலையில் உள்ளது. மாவட்டத்தில் மழையின் அளவினை கண்காணித்திடும் பொருட்டு 24 நிரந்தர மழைமானிகள், 33 தனியங்கி மழை மானிகள் மற்றும் 10 தானியங்கி வானிலை நிலையங்கள் அமைக்கப்பட்டுள்ளது. தாழ்வான இடங்களில் உள்ள பொதுமக்கள் பாதுகாப்பான பகுதிகளுக்கு செல்லவும், ஆற்றங்கரை, குளம் மற்றும் கால்வாய் பகுதிகளுக்கு பொதுமக்கள் செல்வதை தவிர்த்து பாதுகாப்பாக இருக்க வேண்டும். இவ்வாறு அவர் தெரிவித்துள்ளார்.