மாநில அளவிலான கவிதை எழுதுதல் போட்டி வேளாக்குறிச்சி மாணவி மூன்றாமிடம்

கள்ளக்குறிச்சி: கவிதை எழுதுதல் போட்டியில் மாநில அளவில் மூன்றாமிடம் பிடித்த வேளாக்குறிச்சி அரசு நடுநிலைப்பள்ளி மாணவியை சி.இ.ஓ., பாராட்டி சான்றிதழ் வழங்கினார். கள்ளக்குறிச்சி மாவட்டத்தில் உள்ள அரசு பள்ளிகளில் 6 முதல் 8ம் வகுப்பு வரை பயிலும் மாணவ, மாணவிகளுக்கு இலக்கிய மன்ற செயல்பாடுகள் என்ற தலைப்பில் பேச்சு, கட்டுரை, ஓவியம் உட்பட பல்வேறு போட்டிகள் நடத்தப்படுகிறது. முதற்கட்டமாக பள்ளி அளவிலும், அடுத்த கட்டமாக ஒன்றியம் மற்றும் மாவட்ட அளவிலும் போட்டிகள் நடத்தப்பட்டது. மாவட்ட அளவில் நடந்த போட்டியில் முதலிடம் பிடித்த மாணவ, மாணவிகள், மாநில அளவிலான போட்டியில் பங்கேற்க தகுதி பெற்றனர். அதன்படி, கடந்த 11ம் தேதி கோயம்புத்துாரில் மாநில அளவிலான இலக்கிய மன்ற செயல்பாடுகள் போட்டி நடந்தது. இதில், தமிழகத்தின் அனைத்து மாவட்டங்களை சேர்ந்த 6 மற்றும் 7ம் வகுப்பு பயிலும் மாணவர்கள் பங்கேற்றனர். இதில் கள்ளக்குறிச்சி மாவட்டம், வேளாக்குறிச்சி அரசு நடுநிலைப்பள்ளியில் 7ம் வகுப்பு பயிலும் மாணவி கனிமொழி, பசியின்மை என்ற தலைப்பில் சிறப்பாக கவிதை எழுதி மூன்றாமிடம் பிடித்தார். இதையடுத்து கள்ளக்குறிச்சி சி.இ.ஓ., கார்த்திகா, மாநில அளவில் மூன்றாமிடம் பிடித்த மாணவி கனிமொழிக்கு சால்வை அணிவித்து, சான்றிதழ் வழங்கி பாராட்டினார். அப்போது, பள்ளி தலைமை ஆசிரியை விஜயா, வட்டார பயிற்றுநர் விஜயலட்சுமி, முன்னாள் ஆசிரியர் ரத்தினவேல் உட்பட பலர் உடனிருந்தனர்.