சர்க்கரை ஆலையில் மின் உற்பத்தி துவங்குவது எப்போது? விவசாயிகள், பொதுமக்கள் எதிர்பார்ப்பு

கச்சிராயபாளையம்: கச்சிராயபாளையம் கூட்டுறவு சர்க்கரை ஆலையில் 15 ஆண்டுகளாக ஆமை வேகத்தில் நடைபெற்று வரும் இணை மின் உற்பத்தி திட்ட பணிகளை விரைந்து முடித்து பயன்பாட்டிற்கு கொண்டுவர வேண்டும் என விவசாயிகள் மற்றும் பொதுமக்கள் எதிர்பார்க்கின்றனர். கச்சிராயபாளையம் மற்றும் சுற்றுபுற பகுதி மக்களின் முக்கிய வாழ்வாதாரமாக விவசாயம் உள்ளது. இப்பகுதி விவசாயிகள் நெல், கரும்பு ஆகியவற்றை பிரதான பயிராக சாகுபடி செய்து வருகின்றனர். இப்பகுதியில் கரும்பு சாகுபடி அதிகரித்ததால் கடந்த 1997 ம் ஆண்டு கச்சிராயபாளையத்தில் கோமுகி கூட்டுறவு சர்க்கரை ஆலை அலகு 2 துவங்கப்பட்டது. இந்த ஆலை நாளொன்றிற்கு 2500 டன் கரும்பு அரவை செய்யும் திறன் கொண்டது. மின் பற்றாக்குறையை போக்கவும், விவசாயிகள் பயனடையும் வகையிலும், மாநிலத்தில் உள்ள 10 கூட்டுறவு மற்றும் 2 பொதுத்துறை சார்க்கரை ஆலைகளில் நவீன மயமாக்கும் திட்டத்தின் கீழ் 12 முதல் 18 மெகா வாட் மின் உற்பத்தி திறன் கொண்ட இணை மின் உற்பத்தி நிலையம் அமைக்க திட்டமிடப்பட்டது. அதன்படி கச்சிராயபாளையம் கோமுகி கூட்டுறவு சர்க்கரை ஆலை அலகு 2 ல் கடந்த 2010 ம் ஆண்டு ஜூன் மாதம் 5 ம் தேதி, ரூ 78.49 கோடி மதிப்பீட்டில் இணை மின் உற்பத்தி நிலையம் அமைக்கும் பணிகள் தி.மு.க., ஆட்சி காலத்தில் துவங்கப்பட்டது. இங்கு அமைக்கப்படும் இணை மின் உற்பத்தி நிலையம் மூலம் தினம் 15 மெகா வாட் மின்சாரம் உற்பத்தி செய்யப்படும். ஆலை பயன்பாட்டிற்கு போக மீதமுள்ள 10 மெகா வாட் மின்சாரம் மின் வாரியத்திற்கு வழங்க திட்டமிடப்பட்டது. இந்த மின் உற்பத்தி திட்டத்திற்காக திட்ட மதிப்பீட்டில் 10 சதவீதம் தொகை ஆலைக்கு கரும்பு அனுப்பும் விவசாயிகளின் கரும்பு தொகையிலும் பிடித்தம் செய்யப்பட்டது. மேலும் இங்கு உற்பத்தி செய்யப்படும் மின்சாரம் சடையம்பட்டு கிராமத்தில் உள்ள துணை மின் நிலையத்திற்கு எடுத்து செல்லப்பட்டு அங்கிருந்து மக்கள் பயன்பாட்டிற்கு விநியோகம் செய்யவும் திட்டமிடப்பட்டு, பணிகள் மேற்கொள்ளப்பட்டது. அதன்படி 50 சதவீதம் பணிகள் நிறைவடைந்த நிலையில் தொடர்ந்து ஏற்பட்ட ஆட்சி மாற்றத்தால் மின் உற்பத்தி திட்ட பணிகளுக்கு முறையாக நிதி ஒதுக்காததால் பணிகள் பாதியில் நிறுத்தப்பட்டது. இதனால் பல கோடி மதிப்பிலான இயந்திரங்கள் மற்றும் தளவாட பொருட்கள் துரு பிடித்து வீணாகி வருகிறது. பாதியில் நிறுத்தப்பட்ட மின் உற்பத்தி திட்ட பணிகளை மீண்டும் துவங்க வேண்டும் என விவசாயிகள் தொடர்ந்து கோரிக்கை வைத்து வந்தனர். அதனை தொடர்ந்து கடந்த 2018 ம் ஆண்டு மின் உற்பத்தி நிலைய பணிகள் மீண்டும் துவங்கப்பட்டது. பணிகளை நேரில் ஆய்வு செய்த அமைச்சர்கள் மற்றும் அரசு அதிகாரிகள் 2018- 19 ம் ஆண்டின் அரவை பருவத்ததிலேயே மின் உற்பத்தி நிலையம் செயல்பட துவங்கும் என உறுதி அளித்தனர். ஓரிரு மாதங்களில் மீண்டும் மின் உற்பத்தி நிலைய பணிகள் கிடப்பில் போடப்பட்டுள்ளது. கடந்த 2010 ம் ஆண்டு துவங்கப்பட்ட பணிகள் 15 ஆண்டுகள் ஆகியும் இன்றளவும் முடிவடையவில்லை. நீண்ட நாட்களாக பணிகள் கிடப்பில் உள்ளதாலும் பெரும் பகுதியான தளவாட பொருட்கள் அதிகளவில் துருப்பிடித்து காணப்படுவதால் அதன் தரமும் கேள்விக்குறியாகி உள்ளது. அரசு ஒதுக்கீடு செய்த கோடிக்கணக்கான ரூபாய் விரையமாகியதுடன், விவசாயிகளிடம் பிடித்தம் செய்த பணமும் வீணாகியுள்ளது. இதனால் கரும்பு விவசாயிகள் மற்றும் பொது மக்கள் கடும் அதிருப்தி அடைந்துள்ளனர். இதனை தொடர்ந்து தி.மு.க., ஆட்சி காலத்தில் துவங்கப்பட்டு ஆட்சி மாற்றத்தால் மின் உற்பத்தி நிலைய பணிகள் பல ஆண்டுகளாக கிடப்பில் போடப்பட்டது. தற்போது மீண்டும் ஆளுங்கட்சியாக உள்ள நிலையில் இது வரை இணை மின் உற்பத்தி பணிகள் முடிவு பெறாமல் உள்ளது விவசாயிகளிடையே கடும் அதிருப்தியை ஏற்படுத்தியுள்ளது. இதனை தொடர்ந்து கிடப்பில் உள்ள மின் உற்பத்தி நிலைய பணிகளை விரைந்து முடித்து பயன்பாட்டிற்கு கொண்டு வர விவசாயிகள் மற்றும் பொதுமக்கள் நீண்ட காலமாக எதிர்பார்த்து காத்திருக்கின்றனர்.

துருபிடித்து உள்ள இயந்திரங்கள்

கச்சிராயபாளையம் சர்க்கரை ஆலையில் 15 ஆண்டுகளுக்கு முன்பு மின் உற்பத்தி நிலையம் அமைக்க ஏற்பாடு நடந்தது. அதற்காக ஆலை அங்கத்தினர்களிடமிருந்தும் பணம் பிடித்தம் செய்தனர். ஆனால் இது நாள் வரை பணிகள் முடிந்ததாக தெரியவில்லை. ஆலையில் சென்று பார்த்தால் மின் உற்பத்தி நிலையம் அமைக்க எடுத்த தடவாள பொருட்கள் எல்லாம் 15 வருடமாக துருப்பிடித்து கிடக்கிறது. மீண்டும் அதே இயந்திரங்களை பொறுத்தினால் அதன் தரம் எப்படி இருக்கும் என்றும் தெரியவில்லை. இதனால் பல கோடி ரூபாய் அரசு மற்றும் விவசாயிகள் பணம் வீணாகியுள்ளது. ஆறுமுகம், கரும்பு விவசாயி, மாத்துார்.

ஆட்சி மாற்றத்தால் பாதிப்பு

கச்சிராயபாளையம் கூட்டுறவு சர்க்கரை ஆலையில் கடந்த 2010 ஆம் ஆண்டு இணை மின் உற்பத்தி நிலையம் அமைக்கும் பணிகள் துவங்கியது. இதே காலக்கட்டத்தில் பல்வேறு ஆலைகளில் துவங்கப்பட்ட இணை மின் உற்பத்தி நிலையங்களில் மின் உற்பத்தி நடந்து வருகிறது. ஆனால் கச்சிராயபாளையம் கூட்டுறவு சர்க்கரை ஆலையில் மின் உற்பத்தி நிலைய பணிகள் பல ஆண்டுகளாக கிடப்பில் உள்ளது. இங்கு மின் உற்பத்தி செய்யப்பட்டால் நம்ம பகுதியில் மின் தட்டுபாடு குறைவதுடன் ஆலை பயன்பாட்டிற்கும் போதுமானதாக இருக்கும். தி.மு.க., ஆட்சியின் போதுதான் மின் உற்பத்தி நிலையம் துவங்கப்பட்டது. ஆட்சி மாற்றத்தால் கடந்த 10 ஆண்டு காலம் கிடப்பில் இருந்தது. மீண்டும் தி.மு.க., அரசு ஆட்சி பொறுப்பேற்று 5 ஆண்டுகள் நிறைவடைய உள்ளது. அவர்களும் மின் உற்பத்தி நிலைய பணிகளை முடித்து பயன்பாட்டிற்கு கொண்டுவரவில்லை. மின் உற்பித்தி நிலைய பணிகள் துவங்காததால் மூல பொருளான பக்காஸ் இங்கிருந்து பல கிலோ மீட்டர் தொலைவில் உள்ள கரூர் பேப்பர் மில்லுக்கு லாரிகள் மூலம் அனுப்பப்படுகிறது. இதனால் அரசுக்கு லாபம் இல்லை, விவசாயிகள் மற்றும் பொது மக்களுக்கும் எந்த பயனும் ஏற்படவில்லை. எனவே இணை மின் உற்பத்தி நிலைய பணிகளை விரைந்து முடிக்க வேண்டும். வெங்கடேசன், பட்டதாரி விவசாயி, மாதவச்சேரி.