அரசு காப்பகத்திலிருந்து 4 சிறுமியர் தப்பி ஓட்டம்

காஞ்சிபுரம்: காஞ்சிபுரத்தில் உள்ள அரசு குழந்தைகள் காப்பகத்தில் இருந்து தப்பியோடிய நான்கு சிறுமியரை, போலீசார் தேடி வருகின்றனர். காஞ்சிபுரம் தாத்திமேடு பகுதியில், காஞ்சிபுரம் மாவட்ட அரசு குழந்தைகள் காப்பகம் உள்ளது. இங்கு, ஆதரவற்ற குழந்தைகள், திருமணம் மற்றும் பாலியல் வன்கொடுமையில் இருந்து மீட்கப்படும் குழந்தைகளும் பாதுகாக்கப்பட்டு வருகின்றனர். அவ்வாறு, குழந்தை திருமணத்திலிருந்து மீட்கப்பட்ட நான்கு சிறுமியர், குன்றத்துார், ஸ்ரீபெரும்புதுார் பகுதியில் இருந்து, 10 நாட்களுக்கு முன் காஞ்சிபுரத்திற்கு மாற்றப்பட்டனர். மீட்கப்பட்ட, 14 வயதுடைய ஒரு சிறுமி; 15 வயதுடைய இரண்டு சிறுமி; 17 வயதுடை ய ஒரு சிறுமி என, நான்கு சிறுமியர், நேற்று அதிகாலை 2:30 மணிக்கு, காப்பகத்தில் இருந்து வெளியேறி தப்பியோடியுள்ளனர். காப்பக கண்காணிப்பாளர், ஊழியர்களுக்கு நேற்று காலை இதுபற்றி விபரம் தெரியவந்தது. தொடர்ந்து, குழந்தைகள் பாதுகாப்பு அதிகாரிகள், போலீசார், கலெக்டர் உள்ளிட்ட அதிகாரிகளுக்கு தகவல் தெரிவிக்கப்பட்டது. காப்பகத்தை விட்டு தப்பியோடிய சிறுமியரை போலீசார் தேடி வந்த நிலையில், ஒரு சிறுமி, ஸ்ரீபெரும்புதுார் அருகே அவரது வீட்டிற்கு சென்றது தெரியவந்தது. மற்ற மூன்று சிறுமியரை போலீசார் தேடி வருகின்றனர்.