பூர்த்தி செய்த எஸ்.ஐ.ஆர்., படிவங்கள் ஊராட்சிகளில் வழங்க விழிப்புணர்வு

காஞ்சிபுரம்: எஸ்.ஐ.ஆர்., படிவங்களை பூர்த்தி செய்து கொடுக்க வேண்டும் என, ஊராட்சி செயலர் ஒலி பெருக்கி மூலமாக விழிப்புணர்வு ஏற்படுத்தி வருகின்றனர். நாடு முழுதும், சிறப்பு வாக்காளர் பெயர் பட்டியல் தயாரிக்கும் பணி நடந்து வருகிறது. இந்திய தேர்தல் ஆணையம் வழங்கும் படிவத்தை, வருவாய் துறையினர் கிராமங்கள் தோறும், வினியோகம் செய்துள்ளனர். பூர்த்தி செய்த படிவங்களை டிச., 4ம் தேதிக்குள் வழங்க வேண்டும் என, அறிவுரை வழங்கப்பட்டு உள்ளது. வருவாய் துறையினர் வழங்கிய படிவத்தை ஊராட்சிகளில் வசிக்கும் வாக்காளர்கள் பூர்த்தி செய்து கொடுக்கவில்லை என, குற்றச்சாட்டு எழுந்துள்ளது. இதையடுத்து, ஊரக வளர்ச்சி துறையினர், 100 நாள் பணி செய்யும் பணி தளப்பொறுப்பாளர்கள், ஊராட்சி செயலர்கள், மண்டல துணை வட்டார வளர்ச்சி அலுவலர்கள். வட்டார வளர்ச்சி அலுவலர்கள் ஆகியோர் விழிப்புணர்வு ஏற்படுத்தி படிவங்களை பூர்த்தி செய்து கொடுத்து வருகின்றனர். குறிப்பாக காரை, கோவிந்தவாடி, சிறுவாக்கம், ஈஞ்சம்பாக்கம், ஏனாத்துார் உள்ளிட்ட ஊராட்சிகளில் அதன் செயலர்கள் ஒலி பெருக்கி மூலமாக விழிப்புணர்வு ஏற்படுத்தி, எஸ்.ஐ.ஆர்., படிவத்தை நிரப்பி கொடுக்க அறிவுரை வழங்கி வருகின்றனர்.