டிட்வா புயல் எதிரொலி: காஞ்சியில் 72 இடங்கள் தீவிர கண்காணிப்பு

மழை பாதிக்கும் இடங்களில் 21 குழுவினர் முகாம்காஞ்சிபுரம்: 'டிட்வா' புயல் காரணமாக, காஞ்சிபுரம் மாவட்டத்திற்கு, ஆரஞ்ச் அலெர்ட் விடுத்துள்ள நிலையில், மழை, வெள்ளம் பாதிக்கும் 72 இடங்களில், 21 குழுக்கள் அடுத்த இரு நாட்கள் தங்கியிருக்க அறிவுறுத்தப்பட்டுள்ளது. அதன்படி, மழை பாதிக்கும் இடங்களுக்கு, மண்டல குழுவினர் மீட்பு பணிகளுக்கு தயாராகி வருகின்றனர். வங்க கடலில் உருவாகி உள்ள 'டிட்வா' புயல், தமிழகத்தை நெருங்கி வருகிறது. இதனால், செங்கல்பட்டு, விழுப்புரம், ராணிப்பேட்டை, காஞ்சிபுரம், சென்னை, திருவள்ளூர் மாவட்டங்களில் கனமழை முதல் அதிகனமழை பெய்யும் என, வானிலை ஆய்வு மையம் தெரிவித்துள்ளது. காஞ்சிபுரம் மாவட்டத்திற்கு ஆரஞ்ச் அலெர்ட் விடப்பட்டுள்ளது. மழை, வெள்ள பாதிப்புக்கு முன்னெச்சரிக்கை நடவடிக்கைகளை எடுக்க, பேரிடர் மேலாண்மை துறை அதிகாரிகள், அந்தந்த கலெக்டர்களுக்கு அறிவுறுத்தி உள்ளனர். அதன்படி, காஞ்சிபுரம் கலெக்டர் கலைச்செல்வியிடமும், முன்னெச்சரிக்கை நடவடிக்கை எடுக்க தெரிவித்துள்ளனர். அதன்படி, காஞ்சிபுரம் மாவட்டத்தில் மழைக்காக செய்ய வேண்டிய முன்னெச்சரிக்கை நடவடிக்கையை துரிதபடுத்த, காஞ்சிபுரம் கலெக்டர் கலைச்செல்வி உத்தரவிட்டுள்ளார். 'நிவாரண முகாம்களை தயார் நிலையில் வைக்கவும், ஜெனரேட்டர், மணல் மூட்டைகள், உணவு பொருட்கள், மரம் அறுக்கும் இயந்திரங்கள் போன்றவை தயாராக வைக்க' அதிகாரிகளுக்கு கலெக்டர் கலைச்செல்வி அறிவுறுத்தினார். காஞ்சிபுரம் மாவட்டத்தில், மழை பாதிப்புக்கு 72 இடங்கள் கண்டறியப்பட்டுள்ளன. இதில், மிக அதிக பாதிப்புக்குள்ளாகும் 3 இடங்களும், அதிக பாதிப்புக்குள்ளாகும், 21 இடங்களும் கண்டறியப்பட்டுள்ளன. அந்த பகுதிகள் கூடுதல் கவனம் செலுத்தப்பட உள்ளன. மழை பாதிப்பு இடங்களில் பணியாற்ற, 11 துறை அலுவலர்களை கொண்ட, 21 மண்டல குழுக்கள் அமைக்கப்பட்டுள்ளன. இந்த ஒவ்வொரு மண்டல குழுவிலும், மின்வாரியம், போலீஸ், தீயணைப்பு, வருவாய் துறை, உள்ளாட்சி அலுவலர் என 11 அலுவலர்கள் இடம் பெற்றுள்ளனர். பருவமழை தீவிரமடையும் நாட்களில், இந்த 11 துறை அலுவலர்களும், தங்களுக்கு ஒதுக்கப்பட்ட மண்டலத்தில் 24 மணி நேரமும் தயாராக இருப்பர். மழையால் பாதிக்கும் பொதுமக்களை மீட்கவும், முதலுதவி அளிக்கவும் இவர்கள் களத்தில் பணியாற்றுவர். காஞ்சிபுரம் மாவட்டத்தில் மழையால் அதிகம் பாதிக்கப்படும் இடங்கள், காஞ்சிபுரம், குன்றத்துார் மற்றும் ஸ்ரீபெரும்புதுார் தாலுகாக்களில் அதிகளவில் உள்ளன. காஞ்சிபுரம் நகரையொட்டி செல்லும் வேகவதி ஆற்றில், 1,000க்கும் மேற்பட்ட ஆக்கிரமிப்புகள் அகற்றாததால், நுாற்றுக்கணக்கான வீடுகளுக்குள் தண்ணீர் புகுவது வாடிக்கையாக உள்ளது. கடந்த 2021ல் பலரது வீடுகளில் வெள்ள நீர் புகுந்தது. இந்தாண்டு, 300 ஆக்கிரமிப்பு வீடுகளுக்குள் தண்ணீர் புகும் என்ற அச்சம் நிலவுகிறது. முன்னாக, ஆக்கிரமிப்புகளை அகற்ற மாவட்ட நிர்வாகம் நடவடிக்கை எடுக்க வேண்டும்.