வாலாஜாபாதில் சமுதாயக்கூடம் பேரூராட்சி கூட்டத்தில் முடிவு

வாலாஜாபாத்: வாலாஜாபாத் பேரூராட்சியில், புதியதாக சமுதாயக்கூடம் ஏற்படுத்த பேரூராட்சி மன்ற கூட்டத்தில் ஒப்புதல் தீர்மானம் நிறைவேற்றப்பட்டுள்ளது. வாலாஜாபாத் பேரூராட்சிமன்ற சிறப்பு கூட்டம் பேரூராட்சி தலைவர் இல்லாமல்லி தலைமையில் நேற்று நடந்தது. செயல் அலுவலர் யமுனா, துணை தலைவர் சுரேஷ் மற்றும் வார்டு கவுன்சிலர்கள் கூட்டத்தில் பங்கேற்றனர். கூட்டத்தில், வரவு, செலவு கணக்கு வாசிக்கப்பட்டு தீர்மானங்களுக்கு ஒப்புதல் பெறப்பட்டது. வாலாஜாபாதில், பழைய பேரூராட்சி அலுவலகம் செயல்பட்ட இடத்தில் புதியதாக நவீன சமுதாயக்கூடம் ஏற்படுத்த கூட்டத்தில் தீர்மானிக்கப்பட்டது. மேலும், வாலாஜாபாத் 8வது வார்டுக்கு உட்பட்ட பாலாஜி நகர் மற்றும் என்.ஜி.ஒ., நகர் தெருக்களில், மழைக்காலத்தில் குடியிருப்புகளில் தண்ணீர் புகுவதை தடுக்க புதியதாக மழைநீர் வடிகால்வாய் ஏற்படுத்த தீர்மானம் நிறைவேற்றப்பட்டது. வன்னியர் தெரு, பி.கே.செட்டித்தெரு, கங்கை விநாயகர் தெரு, வரசக்தி விநாயகர் தெரு, கனகசபை தெரு மற்றும் வல்லப்பாக்கம் சாலை ஆகிய இடங்களில் மழைநீர் வடிகால்வாய் அமைத்தல், 4வது வார்டு கே.எம்.ராஜகோபால் தெருவில் சிமென்ட் சாலை அமைத்தல் போன்ற பணிகளுக்கு தீர்மானம் நிறைவேற்றப்பட்டது.