பேரிடர் மீட்பு குழுவினர் 25 பேர் தயார் கண்காணிப்பு அலுவலர் நேரில் பார்வை

காஞ்சிபுரம்: மழை, வெள்ள பாதிப்பு முன்னெச்சரிக்கை நடவடிக்கையாக, குன்றத்துாரில், தமிழக பேரிடர் மீட்பு குழுவினர் 25 பேர் தயார் நிலையில் உள்ளனர். வங்க கடலில் உருவாகிய உள்ள, 'டிட்வா' புயல், தமிழகத்தை நெருங்கி வருகிறது. இதனால், வட தமிழகத்தில் உள்ள செங்கல்பட்டு, விழுப்புரம், ராணிப்பேட்டை, காஞ்சிபுரம், சென்னை, திருவள்ளூர் மாவட்டங்களில் கனமழை முதல் அதிகனமழை பெய்யும் என, வானிலை ஆய்வு மையம் தெரிவித்துள்ளது. காஞ்சிபுரம் மாவட்டத்திற்கு ஆரஞ்ச் அலர்ட் விடப்பட்டுள்ளது. மழை, வெள்ள பாதிப்புக்கு முன்னெச்சரிக்கை நடவடிக்கைகளை எடுக்க, பேரிடர் மேலாண்மை துறை அதிகாரிகள், அந்தந்த கலெக்டர்களுக்கு அறிவுறுத்தி உள்ளனர். அதன்படி, காஞ்சிபுரம் கலெக்டர் கலைச்செல்வியிடமும், முன்னெச்சரிக்கை நடவடிக்கை எடுக்க தெரிவித்துள்ளனர். எனவே, காஞ்சிபுரம் மாவட்டத்தில் மழைக்காக செய்ய வேண்டிய முன்னெச்சரிக்கை நடவடிக்கையை துரிதப்படுத்த, காஞ்சிபுரம் கலெக்டர் கலைச்செல்வி உத்தரவிட்டுள்ளார். ' நிவாரண முகாம்களை தயார் நிலையில் வைக்கவும், ஜெனரேட்டர், மணல் மூட்டைகள், உணவு பொருட்கள், மரம் அறுக்கும் இயந்திரங்கள் போன்றவற்றை தயாராக வைக்க ' அதிகாரிகளுக்கு கலெக்டர் கலைச்செல்வி அறிவுறுத்தினார். காஞ்சிபுரம் மாவட்டத்தில், மழை பாதிப்புக்கு 72 இடங்கள் கண்டறியப்பட்டுள்ளன. இதில், மிக அதிக பாதிப்புக்குள்ளாகும் மூன்று இடங்களும், அதிக பாதிப்புக்குள்ளாகும் 21 இடங்களும் கண்டறியப்பட்டுள்ளன. அந்த பகுதிகள் கூடுதல் கவனம் செலுத்தப்பட உள்ளன. மழை பாதிப்பு இடங்களில் பணியாற்ற, 11 துறை அலுவலர்களை கொண்ட, 21 மண்டல குழுக்கள் அமைக்கப்பட்டுள்ளன. அதிக மழை, வெள்ளம் பாதிக்கும் இடங்களாக, குன்றத்துார் தாலுகாவில் உள்ள வரதராஜபுரம், அய்யப்பந்தாங்கல் சுற்றிய பகுதிகளாக இருப்பதால், தமிழக அரசின் பேரிடர் மீட்பு குழுவினர், குன்றத்துாரில் முகாமிட்டுள்ளனர். படகு, மரம் அறுக்கும் இயந்திரங்கள், லைப் ஜாக்கெட் என, அனைத்து வகையான பாதுகாப்பு உபகரணங்களுடன், 25 பேர் தயாராக உள்ளனர். குன்றத்துாரில் மழை, வெள்ள முன்னெச்சரிக்கை நடவடிக்கைகளையும், பேரிடர் மீட்பு குழுவினரையும், மாவட்ட கண்காணிப்பு அலுவலர் கந்தசாமி நேற்று பார்வையிட்டு ஆய்வு செய்தார்.