பனி பொழிவால் விளைச்சல் குறைவு மல்லிகைப்பூ ரூ. 2,000க்கு விற்பனை

காஞ்சிபுரம்: பனி பொழிவு காரணமாக விளைச்சல் பாதிக்கப்பட்டு வரத்து வெகுவாக குறைந்துள்ளதால், காஞ்சிபுரத்தில் நேற்று கிலோ மல்லிகைப்பூ, 2,000 ரூபாய்க்கு விற்கப்பட்டது. -காஞ்சிபுரத்தை சுற்றியுள்ள சிறுவாக்கம், புரிசை, புள்ளலுார், மூலப்பட்டு, மணியாச்சி, சாமந்திபுரம் உள்ளிட்ட வட்டாரங்களிலும், ராணிப்பேட்டை மாவட்டத்தில் சாகுபடி செய்யப்படும் மல்லிகைப்பூ காஞ்சிபுரம் பூக்கடை சத்திரத்திற்கு விற்பனைக்காக கொண்டுவரப்படுகிறது. இந்நிலையில் பனி பொழிவு காரணமாக, மல்லிகை தோட்டங்களில் விளைச்சல் வெகுவாக குறைந்துள்ளது. இதனால், காஞ்சிபுரத்தில் உள்ள பூக்கடை சத்திரத்திற்கு கடந்த சில தினங்களாக மல்லிகைப்பூ வரத்து குறைந்துள்ளதால், நேற்று ஒரு சில வியாபாரிகள் குறைந்த அளவில் மட்டுமே மல்லிகைப்பூ விற்பனை செய்தனர். இதனால், கடந்த வாரம் கிலோ 1,500 ரூபாய்க்கு விற்கப்பட்ட மல்லிகைப்பூ, நேற்று 2,000 ரூபாய்க்கு விற்பனை செய்தனர்.