பயிர்களை நாசம் செய்யும் பன்றிகள் கீழ்கதிர்பூர் விவசாயிகள் போலீசில் புகார்

கீழ்கதிர்பூர்: காஞ்சிபுரம் அடுத்த குண்டுகுளம் கிராமத்தில், தனிநபர் ஒருவர், வளர்த்து வரும் பன்றிகளால் கீழ்கதிர்பூரில் உள்ள விவசாய நிலங்களில் பயிர் சேதமடைகிறது எனவே, பன்றி வளர்ப்பவர் மீது நடவடிக்கை எடுக்க வேண்டும் என, கீழ்கதிர்பூர் விவசாயிகள் பாலுசெட்டிசத்திரம் போலீசில் புகார் மனு அளித்துள்ளனர். புகார் மனு விபரம்: கீழ்கதிர்பூர் கிராமத்தில், விவசாய தொழில் செய்து வசித்து வருகிறோம். எங்கள் கிராமத்திற்கு அருகில் உள்ள குண்டுகுளம் கிராமத்தில் உள்ள தனி நபர் ஒருவர், பன்றிகளை வளர்த்து வருகிறார். ஆனால், அவர் பன்றிகளை கொட்டகையில் அடைத்து வைத்து முறையாக பராமரிக்காமல், பன்றிகளை மேய்ச்சலுக்காக வெளியில் விட்டு விடுகிறார். விவசாய நிலங்களில் பன்றிகளை மேய விடுவதால், எங்கள் விவசாய நிலங்களில் உள்ள பயிர்களை பன்றிகள் நாசப்படுத்தி விடுகின்றன. இதனால், நாங்கள் பெரும் பாதிப்புக்கு உள்ளாகி வருகிறோம். ஆறு மாதங்களாக இதே நிலை உள்ளது. இதுகுறித்து ஏற்கனவே, காஞ்சிபுரம் கலெக்டரிடம் மனு அளித்தோம். கலெக்டர் உத்தரவின்பேரில், வட்டார வளர்ச்சி அலுவலர் முன்னிலையில் விசாரணை நடந்தபோது, குண்டுகுளம் கிராமத்தில் பன்றி வளர்க்கும் தனி நபர், இனிமேல் பன்றிகளை விவசாய நிலம் பாழாகும் வகையில் மேய்ச்சலுக்காக வெளியில் விடமாட்டேன், தவறினால், போலீசார் மூலம் நடவடிக்கை எடுத்து கொள்ளலாம் என, உறுதி அளித்தார். ஆனால், உறுதியளித்தபடி நடந்து கொள்ளாமல், தொடர்ந்து விவசாய நிலங்கள் பாழாகும் வகையில் பன்றிகளை விவசாய நிலங்களில் மேய்ச்சலுக்கு விடுவதால் நாங்கள் பாதிக்கப்படுகிறோம். எனவே, குண்டுகுளம் கிராமத்தில் பன்றிகளை வளர்க்கும் தனிநபர் மீது நடவடிக்கை எடுக்க கேட்டுக்கொள்கிறோம். இவ்வாறு மனுவில் கூறப்பட்டுள்ளது.