| ADDED : நவ 29, 2025 04:49 AM
ஸ்ரீபெரும்புதுார்: படப்பை அடுத்த வஞ்சுவாஞ்சேரி பேருந்து நிறுத்தத்தில் உள்ள பயணியர் நிழற்குடையை மறைத்து வைக்கப்பட்டுள்ள விளம்பர பேனரை அகற்ற வேண்டும் என, பயணியர் கோரிக்கை விடுத்துள்ளனர். வண்டலுார் - வாலாஜாபாத் சாலையில், படப்பை அடுத்த வஞ்சுவாஞ்சேரியில் உள்ள பேருந்து நிறுத்தத்தை பயன்படுத்தி, அப்பகுதி மக்கள் ஒரகடம், வாலாஜாபாத், ஸ்ரீபெரும்புதுார், காஞ்சிபுரம் உள்ளிட்ட பல்வேறு பகுதிகளுக்கு சென்று வருகின்றனர். அதேபோல், வஞ்சுவாஞ்சேரியில் உள்ள மூன்று தனியார் கல்லுாரிக்கு செல்லும், ஆயிரக்கணக்கான மாணவ - மாணவியர் இந்த பேருந்து நிறுத்தத்தை பயன்படுத்தி சென்று வருகின்றனர். இந்த பேருந்து நிறுத்தத்தில், பயணியர் வசதிக்காக நிழற்குடை அமைக்கப்பட்டுள்ளது. இந்நிலையில், பேருந்து நிறுத்தம் அருகே உள்ள தனியார் வீட்டு உபயோக பொருட்கள் விற்பனை நிறுவனம், தங்களின் விளம்பர பேனரை, பயணியர் நிழற்குடையை மறைத்து வைத்துள்ளது. இதனால், நிழற்குடையில் பேருந்திற்காக காத்திருக்கும் பயணியருக்கு, பேருந்து வருவது தெரியாமல் போகிறது. இதனால் பேருந்தை தவறவிடும் சூழல் ஏற்படுகிறது. எனவே, பயணியர் நிழற்குடையை மறைத்து வைக்கப்பட்டுள்ள, விளம்பர பேனரை அகற்ற, சம்பந்தப்பட்ட அதிகாரிகள் நடவடிக்கை எடுக்க வேண்டும் என, பயணியர் கோரிக்கை விடுத்து உள்ளனர்.