நடைபாதை ஆக்கிரமிப்பு கடைகளை அகற்ற பாதசாரிகள் வலியுறுத்தல்

காஞ்சிபுரம்: காஞ்சிபுரம் ராஜ வீதிகளில் உள்ள நடைபாதை ஆக்கிரமிப்புகளை அகற்ற வேண்டும் என, மக்கள் வலியுறுத்தி வருகின்றனர். காஞ்சிபுரத்தில் கிழக்கு ராஜ வீதி, மேற்கு ராஜ வீதி, செங்கழுநீரோடை வீதி, அன்னை இந்திரா காந்தி சாலை என, நான்கு ராஜ வீதிகளிலும், நெடுஞ்சாலைத்துறை சார்பில், சாலையோரம் மழைநீர் வடிகால்வாய் அமைக்கப்பட்டு, அதன் மீது நடைபாதை அமைக்கப்பட்டுள்ளது. பாதசாரிகள் நடந்து செல்வதற்காக அமைக்கப்பட்ட நடைபாதையை, கடைக்காரர்கள் தங்களது கடையை விரிவாக்கம் செய்து ஆக்கிரமிப்பு செய்துள்ளனர். மேலும், சாலையோரங்களில் காய்கறி, பழம், பூ உள்ளிட்டவை விற்பனை செய்யும் தள்ளுவண்டி, நடமாடும் வாகன கடைகாரரர்கள் சாலையை ஆக்கிரமித்துள்ளனர். இதனால், கடைகளுக்கு வரும் வாகனங்கள் சாலையில் நிறுத்தப்படுவதால், சாலையின் அகலம் வெகுவாக குறைந்து வருகிறது. இதனால், நடைபாதையில் நடந்து செல்ல வேண்டிய பாதசாரிகள், சாலையின் மையப்பகுதியில் நடந்து செல்ல வேண்டி உள்ளது. நான்கு ராஜ வீதகளிலும் உள்ள நடைபாதை மற்றும் சாலையோர ஆக்கிரமிப்புகளை முழுமையாக அகற்ற, சம்பந்தப்பட்ட துறை அதிகாரிகள் நடவடிக்கை எடுக்க வேண்டும் என, பாதசாரிகள் மற்றும் மக்கள் வலியுறுத்தி வருகின்றனர்.