அம்ரூத் திட்ட குடிநீர் இணைப்புக்கு மீட்டர் பொருத்தும் பணி துவக்கம் கூடுதல் கட்டணம் செலுத்த வேண்டி வரும் என மக்கள் புலம்பல்

காஞ்சிபுரம்: 'அம்ரூத்' திட்ட குடிநீர் இணைப்பிற்கு மீட்டர் பொருத்தும் பணி துவங்கி உள்ளது. மின்சாரத்தை பயன்படுத்துவரை போல, குடிநீருக்கும் கட்டணம் செலுத்த வேண்டி இருக்கும் என, பேரூராட்சி மக்கள் தெரிவிக்கின்றனர். காஞ்சிபுரம் மாவட்டத்தில், காஞ்சிபுரம் மாநகராட்சி, குன்றத்துார், மாங்காடு , ஸ்ரீபெரும்புதுார் ஆகிய நகராட்சிகள், வாலாஜாபாத், உத்திரமேரூர் ஆகிய பேரூராட்சிகளும் என, நகர்ப்புற உள்ளாட்சிகள் உள்ளன. புத்துணர்ச்சி மற்றும் நகர்ப்புற மாற்றத்திற்கான, 'அம்ரூத்' திட்டத்தின் கீழ், 2021 - 22ம் ஆண்டு முதல், 2025 - 26 வரை, குடிநீர் வழங்குதல், கழிவுநீர் மேலாண்மை, மழைநீர் கால்வாய் வசதி ஏற்படுத்துதல் மற்றும் நகர்ப்புற இடங்களில், பசுமையான பூங்காக்கள் அமைக்கும் பணிகளை செய்யலாம் என, அனுமதி அளிக்கப்பட்டு உள்ளன. வாலாஜாபாத், உத்திரமேரூர் ஆகிய பேரூராட்சிகளில், 35.69 கோடி ரூபாய் செலவில், குடிநீர் பணிகளுக்கு ஒதுக்கீடு செய்யப்பட்டு உள்ளன. ஒவ்வொரு பேரூராட்சிக்கும் தலா, 4,000 குடியிருப்புகளுக்கு மீட்டர் பொருத்த இலக்கு நிர்ணயம் செய்யப்பட்டு உள்ளது. தற்போது, வாலாஜாபாத், உத்திரமேரூர் ஆகிய பேரூராட்சிகளில், வீடுதோறும் குடிநீர் வினியோகம் செய்வதற்கு, அளவீடு மீட்டர் கருவி பொருத்தும் பணி நடந்து வருகின்றது. ஏற்கனவே, பேரூராட்சி குடியிருப்பு குடிநீர் வினியோகத்திற்கு, மாதம், 75 ரூபாய் வீதம் 12 மாதங்களுக்கு, 900 ரூபாய் கட்டணம் செலுத்தப்படுகிறது. வணிக நிறுவன குடிநீர் இணைப்புக்கு ஆண்டிற்கு, 1,800 ரூபாய் செலுத்தப் படுகிறது. இந்த, 'அம்ரூத்' திட்டத்தில், குடிநீர் வினியோகம் மீட்டர் மூலமாக, 1,000 லிட்டர் குடிநீருக்கு 40 ரூபாய் வீதம் என, குடிநீர் உபயோகத்திற்கு ஏற்ப கட்டணத்தை செலுத்த வேண்டி இருக்கும் என, பேரூராட்சி மக்கள் புலம்பி வருகின்றனர். மின்சாரம் பயன்பாடு போல, குடிநீர் பயன்பாட்டிற்கும் மின் கட்டணத்தை வசூலிக்கும் சூழல் உள்ளது என, பேரூராட்சி மக்கள் இடையே அச்சத்தை ஏற்படுத்தி உள்ளது. இதுகுறித்து, வாலாஜாபாத் பேரூராட்சியைச் சேர்ந்த குடியிருப்புவாசிகள் கூறியதாவது: மூன்று தினங்களுக்கு ஒரு முறை வினியோகிக்கப்படும் குடிநீருக்கு ஆண்டிற்கு 900 ரூபாய் கட்டணம் செலுத்தி வருகிறோம். குடிநீர் வினியோகத்திற்கு, மீட்டர் பொருத்தி அளவீடு என்கிற பெயரில், அதிக கட்டணம் வசூலிக்கும் முடிவினை பேரூராட்சி நிர்வாகம் முற்றிலும் கைவிட வேண்டும். இவ்வாறு அவர்கள் கூறினர். இதுகுறித்து, காஞ்சிபுரம் மாவட்டத்தைச் சேர்ந்த நகர்ப்புற உள்ளாட்சி நிர்வாக அதிகாரி ஒருவர் கூறியதாவது: குடிநீர் இணைப்புகளுக்கு, தண்ணீர் அளக்கும் அளவீடு மீட்டர் பொருத்தும் பணிகள் தீவிரமாக நடந்து வருகிறது. தற்போது, 80 சதவீத பணிகள் நிறைவு பெற்றுள்ளன. இவ்வாறு அவர் கூறினார்.