திருவண்ணாமலை திருக்குடை யாத்திரை: காஞ்சியில் வரவேற்பு

காஞ்சிபுரம்: கார்த்திகை தீப திருவிழாவிற்கு, திருவண்ணாமலை அண்ணாமலையார் கோவிலுக்கு திருக்குடைகள் காணிக்கையாக வழங்கும் உபய யாத்திரைகுழுவினருக்கு காஞ்சிபுரத்தில் வரவேற்பு அளிக்கப்பட்டது. ஹிந்து ஆன்மிக சேவா சமிதி அறக்கட்டளை சார்பில். ஆண்டு தோறும் திருவண்ணாமலை அண்ணாமலையாருக்கு கார்த்திகை தீபத்திருவிழாவின் போது திருக்குடைகள் உபயமாக வழங்கப்பட்டு வருகிறது. அதன்படி 12வது ஆண்டு திருக்குடைகள் உபய யாத்திரை குழுவினர், சென்னை வடதிருமுல்லைவாயில் மாசிலாமணீஸ்வரர் கோவிலில் இருந்து புறப்பட்டு, திருவண்ணாமலைக்கு செல்லும் வழியில் உள்ள பல்வேறு சிவன் கோவில்களில் தரிசனம் செய்த குழுவினர் நேற்று யாத்திரையாக காஞ்சிபுரம் வந்தனர். பெரிய காஞ்சிபுரம் பஞ்சுப்பேட்டையில் அமைந்துள்ள அண்ணாமலையார் சிவன் கோவிலில், திருக்குடைகளுக்கு சிறப்பு பூஜைகள் நடத்தப்பட்டு குழுவினருக்கும் சிறப்பான வரவேற்பு அளிக்கப்பட்டது. காஞ்சிபுரம் வீதிகளில் யாத்திரையாக சென்ற குழுவினர் திருவண்ணாமலைக்கு சென்றதும் அண்ணாமலை யாருக்கும், உண்ணாமுலையம்மனுக்கும் திருக்குடைகளை காணிக்கையாக வழங்க உள்ளனர்.