கடன் கட்டுவதை தவிர்க்க மாமாவை போட்டு தள்ளிய மைத்துனர் கூட்டாளியுடன் கைது

கிருஷ்ணகிரி, குருபரப்பள்ளி அருகே, அக்கா கணவர் பெயரில் வாங்கிய வங்கி கடனை அடைக்க முடியாமல், அவரை கொலை செய்து நாடகமாடிய மைத்துனர் உள்பட இருவரை போலீசார் கைது செய்தனர்.கிருஷ்ணகிரி மாவட்டம், குருபரப்பள்ளி அடுத்த எண்ணேகொள்புதுாரை சேர்ந்தவர் ரகுபதி, 40, விவசாயி. இவரது மனைவி சந்திரா, 37. சந்திராவின் தம்பி ராஜா, 35, என்பவர், ரகுபதியின் ஆவணங்களை வைத்து வீட்டுக்கடன், 28 லட்சம், நகைக்கடன், 18 லட்சம், லாரி வாங்குவதற்காக, 20 லட்சம் ரூபாய் தனியார் வங்கிகளில் கடன் பெற்றுள்ளார்.இந்நிலையில் கடந்த, 21ல், ரகுபதி டூவீலரில் குருபரப்பள்ளி அருகே பத்தலப்பள்ளி சாலையில் சென்றபோது, பின்னால் வந்த கார் மோதி படுகாயமடைந்தார். தர்மபுரி அரசு மருத்துவமனையில் சிகிச்சை பெற்று வந்த நிலையில், 23ல் உயிரிழந்தார். இவரது சாவில் மர்மம் இருப்பதாக, ரகுபதியின் பெரியப்பா மகன் நாகராஜ், 54, குருபரப்பள்ளி போலீசில் புகார் அளித்தார். அதன்படி போலீசார் விசாரணை நடத்தியதில், ரகுபதியின் பெயரில் வாங்கிய கடனை அடைக்காமல் இருக்க, அவரை கொலை செய்ய அவரது மைத்துனர் ராஜா, அவரது கூட்டாளி சரத்குமார் ஆகியோர் திட்டமிட்டு அவர் மீது காரில் மோதி, இரும்பு ராடால் அடித்தது தெரியவந்தது. இதையடுத்து குருபரப்பள்ளி போலீசார் இருவரையும் கைது செய்தனர்.இது குறித்து போலீசார் கூறியதாவது: ரகுபதி பெயரில் அவரது மைத்துனர் ராஜா தனியார் வங்கிகளில், 66 லட்சம் ரூபாய் கடன் பெற்று, வீடு, லாரி, கார் வாங்கி உள்ளார். அவற்றிற்கு மாதம், 1 லட்சம் ரூபாய் கட்ட வேண்டி இருந்தது. ஆனால் ராஜாவால் அந்த தொகையை கட்ட முடியவில்லை. வங்கி அலுவலர்கள் ரகுபதிக்கு கொடுத்த அழுத்தத்தின்படி, மைத்துனர் ராஜாவிடம் பணத்தை கட்டுமாறு வற்புறுத்தியுள்ளார்.இது குறித்து ராஜா, தன் நண்பரான காவேரிப்பட்டணம் அடுத்த சாப்பர்த்தியை சேர்ந்த சரத்குமார், 27, என்பவரிடம் கூறியுள்ளார். இதையடுத்து, இருவரும் சேர்ந்து ரகுபதியை கொல்ல திட்டமிட்டனர். அவரது சாவு, விபத்து போல் இருந்தால் வங்கிகளுக்கு பணம் கட்டுவதை தவிர்க்கலாம் எனவும் நினைத்துள்ளனர். அதன்படி ரகுபதிக்கு கடந்த, 21 நள்ளிரவில் போன் செய்த ராஜா, புதிதாக வாங்கிய லாரியை போலீசார் பத்தலப்பள்ளி அருகே பிடித்துள்ளதாகவும், உடனடியாக வருமாறும் கூறி அழைத்துள்ளார்.அங்கு டூவீலரில் வந்த ரகுபதியை, பின்னால் காரில் சென்று மோதியுள்ளனர். நிலைதடுமாறி விழுந்த அவரை இரும்பு ராடால், இருவரும் சேர்ந்து தாக்கிவிட்டு, சிறிது துாரம் தள்ளி சென்று காரை நிறுத்திவிட்டு, தங்களிடம் பணிபுரியும் லாரி டிரைவரான கர்நாடக மாநிலம், பன்னார்கட்டாவை சேர்ந்த வினோத்குமார், 28, என்பவரை கார் மோதிய வழக்கில் ஆஜராக சொன்னதும் தெரிந்தது. இந்த வழக்கில், வினோத்குமாரிடமும் விசாரித்து வருகிறோம்.இவ்வாறு கூறினர்.