ஓசூர், தமிழக துணை முதல்வர் உதயநிதி பிறந்தநாள் விழாவையொட்டி, கிருஷ்ணகிரி மேற்கு மாவட்ட தி.மு.க., சார்பில், ஓசூர் - தளி சாலையோரம் உள்ள மைதானத்தில், ஆண்கள் மற்றும் பெண்களுக்கான மாநில அளவிலான மூன்று நாள் கபடி போட்டி நேற்று துவங்கியது.ஓசூர் தி.மு.க., - எம்.எல்.ஏ., பிரகாஷ் துவக்கி வைத்து, அணிவகுப்பு மரியாதையை ஏற்றுக் கொண்டார். 38 மாவட்டங்களில் இருந்து, 40 ஆண்கள், 4 பெண்கள் அணிகள் பங்கேற்றுள்ளன. ஆண்கள் பிரிவில் வெற்றி பெறும் அணிக்கு முதல் பரிசாக, 1.50 லட்சம் ரூபாய், இரண்டாம் பரிக, 1 லட்சம் ரூபாய், 3ம் மற்றும் 4ம் பரிசாக தலா, 50,000 ரூபாய், பெண்கள் பிரிவில், முதல் இரு இடங்களை பெறும் அணிகளுக்கு தலா, 50,000 ரூபாய் வழங்கப்படுகிறது.இந்த போட்டி மூலம், தேசிய அளவிலான கபடி போட்டிக்கு, தமிழக ஆண்கள் அணிக்கு, 20 வீரர்கள் தேர்வு செய்யப்பட உள்ளனர். தமிழ்நாடு அமெச்சூர் கபடி கழகம் முன்னிலையில் தேர்வு நடக்கிறது. போட்டியை, 8,000 பேர் அமர்ந்து பார்க்கும் வகையில் கேலரி அமைக்கப்பட்டுள்ளது. பகல், இரவு போட்டியாக நடக்கிறது.மாநகர மேயர் சத்யா, மேற்கு மாவட்ட அவைத்தலைவர் யுவராஜ், முன்னாள் எம்.எல்.ஏ., முருகன், பொருளாளர் சுகுமாரன், மாநில கலை, இலக்கிய பகுத்தறிவு பேரவை மாநில துணை செயலாளர் மாதேஸ்வரன் உள்பட பலர் பங்கேற்றனர். நாளை (நவ., 30) இறுதி போட்டி நடத்தப்பட்டு, வெற்றி பெறும் அணிக்கு அமைச்சர் சக்கரபாணி பரிசு வழங்க உள்ளார்.