மதுரையில் ஜூனியர் ஹாக்கி உலகக்கோப்பை அவசரகதியில் பார்வையாளர் காலரி அமைப்பு

மதுரை: மதுரை ரேஸ்கோர்ஸ் மைதானத்தில் ஆடவர் ஜூனியர் ஹாக்கி உலகக்கோப்பை போட்டி துவங்கிய நிலையில் நிரந்தர, தற்காலிக காலரிகளில் உள்ள 25 சதவீத பார்வையாளர்கள் போட்டியை பார்க்க முடியாத அளவு தடுப்புகள் இருந்தன. நேற்று (நவ.,28) லீக் சுற்று போட்டிகள் துவங்கிய நிலையில், அவசரகதியில் பார்வையாளர் காலரி அமைக்கப்பட்டது. போட்டி துவங்குவதற்கு ஒருநாள் முன்பு தான் செயற்கை நீருற்றுக்கான பணிகள் துவங்கப்பட்டன. நிரந்தர காலரியின் நடுவில் உள்ள வி.ஐ.பி., காலரியில் 40 பேர், இருபக்கமும் உள்ள காலரியில் தலா 150 பேர் பார்க்கும் வசதி உள்ளது. இதுதவிர கீழ்பகுதியில் வீரர்கள் ஓய்வெடுக்கும் அறையை அடுத்துள்ள வி.ஐ.பி., அறையில் அமர்ந்து பார்க்கும் வசதி, வி.ஐ.பி., அறை, ஹாக்கி அரங்கு இடைப்பட்ட இடத்தில் மூன்று வரிசையில் திறந்தவெளி காலரி அமைக்கப்பட்டுள்ளது. ஹாக்கி அரங்கையொட்டி நான்கு தடுப்புகளாக 1200 பேர் அமர்ந்து பார்க்கும் வகையில் தற்காலிக காலரிகள் அமைக்கப்பட்டுள்ளன. ஹாக்கி அரங்கையொட்டி ஒரு மீட்டர் உயரம் வரை தடுப்புகள் அமைக்கப்பட்டு அதில் விளம்பரதாரர்களின் விளம்பரங்கள் தொடர்ந்து திரையில் காட்டப்படுகின்றன. அந்த ஒரு மீட்டர் உயரம் வரையிலான பார்வையாளர் காலரியில் அமைந்துள்ள இரண்டு வரிசை நாற்காலிகளில் அமர்பவர்களால் போட்டியை பார்க்க முடியவில்லை. ஹாக்கி வீரர்கள் ஓடிக்கொண்டே பந்தை தடுப்பதை பார்ப்பதும் கோல் அடிப்பதை பார்ப்பதும் தான் பார்வையாளர்களை பரவசப்படுத்தும். ஆனால் முன்வரிசை பார்வையாளர்களால் அந்த பரவசத்தை அனுபவிக்க முடியாமல் வீரர்களின் மேல்பகுதி உடம்பு மட்டும் தெரியும் வகையில் காலரி அமைக்கப்பட்டுள்ளது. தற்காலிக காலரியிலும் இதே பிரச்னை தான். நிரந்தர காலரியில் ஹாக்கி அரங்கையொட்டி ஹாக்கி சங்கங்களுக்காக ஒதுக்கப்பட்டுள்ள மூன்றாவது வரிசை நாற்காலியில் அமர்பவர்கள் மட்டுமே போட்டிகளை ரசிக்க முடிந்தது. 2வது, முதலாவது வரிசையில் இருந்தவர்களால் போட்டியை முழுவதுமாக பார்க்க முடியவில்லை. அதாவது ஹாக்கி அரங்கு, விளையாட்டு போட்டிக்கு ஏற்ப எப்படி காலரி அமைக்க வேண்டும் என்பதை முன்கூட்டியே திட்டமிடாததால் வந்த பிரச்னை இது. முன்னாள் வீரர்கள் ஏமாற்றம் ஹாக்கி முன்னாள் வீரர்களை பெருமைப்படுத்தும் வகையில், அவர்கள் போட்டியை பார்ப்பதற்காக, ஹாக்கி சங்கங்கள் சார்பில் அடையாள அனுமதி அட்டை கேட்கப்பட்டது. ஆனால் ஹாக்கி இந்தியா, தமிழ்நாடு விளையாட்டு மேம்பாட்டு ஆணையம், மாவட்ட நிர்வாகம், காவல்துறைகள் ஒருங்கிணைந்து செயல்படாததால் முன்னாள் வீரர்களுக்கு அனுமதி அட்டை வழங்கப்படவில்லை. தினமும் காலை 9:00 மணி முதல் மதியம் 3:45 மணி வரை நான்கு போட்டிகள் நடக்கின்றன. பார்வையாளர்கள் ஆன்லைன் டிக்கெட் எடுத்தாலும் காலையில் இரு போட்டிகளை பார்த்த பின் வெளியே சென்று சாப்பிட்டு மீண்டும் வர முடியாத அளவு போலீசார் கெடுபிடி அதிகமாக உள்ளது. தற்காலிக காலரியில் ஒரு பகுதியில் பள்ளி, கல்லுாரி மாணவர்கள் குழுவாக பார்ப்பதற்கு வசதி செய்யப்பட்டுள்ளது. மற்றொரு தற்காலிக காலரிக்காக ஆன்லைன் இலவச டிக்கெட்கள் அலைபேசி செயலி மூலம் பெற வேண்டியுள்ளது. செயலியில் நுழைந்தால் டிக்கெட்கள் இல்லை என்று காட்டுகிறது. ஆனால் அரங்கில் 20 சதவீத இருக்கைகள் காலியாக இருந்தன.