தமிழக பசுமை சாம்பியன் விருது: விண்ணப்பிக்க கலெக்டர் அழைப்பு

நாமக்கல், 'தமிழ்நாடு பசுமை சாம்பியன்' விருதுக்கு, தகுதியானவர்கள் விண்ணப்பிக்கலாம் என, மாவட்ட நிர்வாகம் அழைப்பு விடுத்துள்ளது. இதுகுறித்து, கலெக்டர் துர்கா மூர்த்தி வெளியிட்ட செய்திக்குறிப்பு:சுற்றுச்சூழல் பாதுகாப்பிற்கு முன்முயற்சியுடன் பங்கேற்று, சிறந்த பங்களிப்பை செய்யும் தனிநபர்கள் மற்றும் அமைப்புகளுக்கு, ஒரு கோடி ரூபாய் செலவில், 'பசுமை சாம்பியன் விருது' வழங்கப்படும் என, தமிழக சுற்றுச்சூழல் மற்றும் காலநிலை மாற்றத்துறை அமைச்சகம் அறிவித்துள்ளது. ஒவ்வொரு ஆண்டும் விருது பெறும், 100 பேர், நிறுவனங்களுக்கு தலா, ஒரு லட்சம் ரூபாய் பரிசுத்தொகை வழங்கப்படும்.நடப்பாண்டிற்கான, 'பசுமை சாம்பியன் விருது'களை, சுற்றுச்சூழல் பாதுகாப்பிற்கு முன்மாதிரியான பங்களிப்பு செய்த அமைப்புகள், கல்வி நிறுவனங்கள், பள்ளி, கல்லுாரிகள், குடியிருப்பு நலச்சங்கங்கள், தனிநபர்கள், உள்ளாட்சி அமைப்பு, தொழில்துறைகள் போன்றவற்றை கவுரவிக்க முன்மொழிந்துள்ளது. சுற்றுச்சூழல் கல்வி மற்றும் பயிற்சி, சுற்றுச்சூழல் விழிப்புணர்வு, சுற்றுச்சூழல் பாதுகாப்பு, புதுமையான பசுமை தயாரிப்புகள், பசுமை தொழில்நுட்பத்திற்கான ஆராய்ச்சி மற்றும் அறிவியல் ஆய்வுகள், நிலையான வளர்ச்சி, திடக்கழிவு மேலாண்மை, நீர் மற்றும் நீர்நிலைகள் பாதுகாப்பு, காலநிலை மாற்ற தழுவல் மற்றும் தணிப்பு, உமிழ்வு குறைப்பு, பிளாஸ்டிக் கழிவுகளை கட்டுப்படுத்துதல் மற்றும் மறுசுழற்சி செய்தல், சுற்றுச்சூழல் மறுசீரமைப்பு, பாதுகாப்பு நடவடிக்கைகள், கடலோர பகுதி பாதுகாப்பு, பிற சுற்றுச்சூழல் தொடர்பான திட்டங்கள் ஆகிய பிரிவுகளில் விண்ணப்பிக்கலாம்.தமிழ்நாடு மாசு கட்டுப்பாடு வாரியம், அந்தந்த மாவட்ட கலெக்டர்கள் தலைமையிலான மாவட்ட அளவிலான விருதுக்குழு மூலம் ஒவ்வொரு ஆண்டும், 100 அமைப்புகள், கல்வி நிறுவனங்கள், பள்ளிகள், கல்லுாரிகள், குடியிருப்பு நலச்சங்கங்கள், தனிநபர்கள், உள்ளாட்சி அமைப்புகள், தொழிற்சாலைகள் தேர்ந்தெடுக்கும்.மேற்கூறிய விருதுக்கு, நிரப்ப வேண்டிய படிவம், தமிழ்நாடு மாசு கட்டுப்பாடு வாரிய இணையதளத்தில் (www.tnpcb.gov.in(http://www.tnpcb.gov.in) ) உள்ளது. கூடுதல் தகவலுக்கு, சம்பந்தப்பட்ட மாவட்ட சுற்றுச்சூழல் பொறியாளர், தமிழ்நாடு மாசு கட்டுப்பாடு வாரியத்தை தொடர்பு கொள்ளலாம். ஜன., 20, 2026ம் தேதிக்குள் விண்ணப்பிக்க வேண்டும். இவ்வாறு கலெக்டர் தெரிவித்துள்ளார்.