உரிமை கோராத டிபாசிட், இன்சூரன்ஸ் தொகை ரூ.1.32 கோடி உரியவர்களிடம் வழங்கல்

நாமக்கல், நாமக்கல் மாவட்டத்தில், உரிமை கோரப்படாத, 1.32 கோடி ரூபாய் மதிப்பிலான பேங்க் டிபாசிட், இன்சூரன்ஸ் தொகையை, நாமக்கல் கலெக்டர் துர்கா மூர்த்தி உரியவர்களிடம் வழங்கினார்.மத்திய நிதியமைச்சகத்தின் வழிகாட்டுதல்படி, நாமக்கல் மாவட்டத்தில் நீண்டகாலமாக உரிமை கோரப்படாத பேங்க் டிபாசிட்டுகள், இன்ஸ்சூரன்ஸ் தொகைகள் ஆகியவற்றை உரியவர்களுக்கு ஒப்படைக்கும் முகாம், நாமக்கல் டி.ஆர்.டி.ஏ., அலுவலகத்தில் நடந்தது. இந்த முகாமின் முக்கிய நோக்கம், நீண்டகாலமாக உரிமை கோரப்படாத வங்கி கணக்குகள், நிலுவையில் உள்ள டிபாசிட்டுகள், இன்சூரன்ஸ் தொகைகள் போன்ற நிதி சொத்துக்கள் குறித்து விழிப்புணர்வு ஏற்படுத்தப்படுகிறது. சம்பந்தப்பட்ட உரிமையாளர்கள் அல்லது அவர்களது சட்டப்பூர்வ வாரிசுகள், தங்களது உரிமை கோரப்படாத நிதி சொத்துக்களை மீட்க உதவுவதாகும். அந்தவகையில், நாமக்கல் மாவட்டத்தில் 2,96,337 வங்கி கணக்குகளில், 61.93 கோடி ரூபாய் நிதி உரிமை கோரப்படாமல் நிலுவையில் உள்ளது. வங்கிகளில், 10 ஆண்டுகளுக்கு மேல் செயல்படாத கணக்குகள் அல்லது கோரப்படாத வைப்புதொகைகள் இருப்பின், அவை ரிசர்வ் வங்கியின் டிபாசிட்டர் கல்வி மற்றும் விழிப்புணர்வு நிதிக்கு மாற்றப்படுகின்றன. இதை பொதுமக்கள் தங்களது வங்கி வெப்சைட்கள் அல்லது ரிசர்வ் வங்கியின் வெப்சைட் மூலம் அறிந்துகொள்ளலாம். உரிய ஆவணங்களுடன் உரிமையாளர்கள் அல்லது அவர்களது சட்டப்பூர்வ வாரிசுகள் எந்தநேரத்திலும் இத்தொகைகளை கோரி பெறலாம்.நாமக்கல் மாவட்டத்தில் உரிமை கோரப்படாத, 1.32 கோடி ரூபாய் மதிப்பிலான வங்கி டிபாசிட்டுகள், இன்சூரன்ஸ் தொகைகளை, 303 பயனாளிகளுக்கு கலெக்டர் வழங்கினார். அனைத்து வங்கிகள், இன்சூரன்ஸ் நிறுவனங்கள் மற்றும் இதர நிதிநிறுவன கிளைகளில், டிச., 31 வரை தொடர்ச்சியாக இந்த முகாம்கள் நடைபெற உள்ளது. பொதுமக்கள் இதை பயன்படுத்தி தங்களுக்கு சேரவேண்டிய தொகையை பெற்றுக்கொள்ளலாம் என, நாமக்கல் மாவட்ட கலெக்டர் துர்கா மூர்த்தி தெரிவித்தார்.