ஊட்டியில் விளையாட்டு விழா: 60 கால்பந்து அணிகள் பங்கேற்பு

ஊட்டி: இளைஞர்களின் திறனை ஊக்குவிக்கும் பொருட்டு, 'சம்சாத் கேல் மஹோத்சவ்' விளையாட்டு திருவிழா நாடு முழுவதும் நடந்து வருகிறது. 'உடல் ஆரோக்கியத்திற்கு உண்மையாக துணை நிற்பது விளையாட்டு. வெற்றி பெறுவதும், தோல்வியில் இருந்து கற்பதும், ஆடுகளத்தில், நாம் கற்கும் சிறந்த கலையாகும்,' என, பிரதமர் மோடி தெரிவித்துள்ளார். அவரது வழிகாட்டுதல் படி, ஊட்டியில் விளையாட்டு திருவிழா நடத்தப்படுகிறது. மத்திய தகவல் ஒளிபரப்பு மற்றும் பார்லிமென்ட் விவகாரங்கள் துறை இணை அமைச்சர் முருகன் ஒருங்கிணைப்பில், நீலகிரி மாவட்டத்தில், கால்பந்து போட்டி நேற்று துவங்கியது. தேசிய விளையாட்டு ஆணைய கால்பந்து பயிற்சியாளர் சக்ரியா, மாவட்ட விளையாட்டு அலுவலர் இந்திரா, மாவட்ட பா.ஜ., தலைவர் தருமன் ஆகியோர், இந்த போட்டிகளை துவக்கி வைத்தனர். போட்டி தொடரில், மாவட்டத்தைச் சேர்ந்த, 60க்கும் மேற்பட்ட அணிகள் பங்கேற்று விளையாடுகின்றன. இறுதிப்போட்டி, டிச., 25ம் தேதி நடக்கிறது.