டால்பின்நோஸ் கடைகளை காலி செய்ய உத்தரவு : அதிகாரிகள் ஆய்வு செய்து நோட்டீஸ்

குன்னுார்: குன்னுார் டால்பின்நோஸ் காட்சிமுனையில் கடைகளின் நிலுவை தொகை கட்டவும், காலி செய்து, கடைகளை புதுப்பிக்க நோட்டீஸ் வழங்கப்பட்டது. குன்னுாரில் வனத்துறை கட்டுப்பாட்டில் உள்ள, டால்பின்நோஸ் காட்சிமுனையில், பர்லியார் ஊராட்சி சார்பில், 12 கடைகள் உள்ளன. கடைகள் ஏலம் விடுவதில் உள்ள பிரச்னைகள் நீடித்த நிலையில், வாழ்வாதாரம் பாதிப்பதாக கூறி, வியாபாரிகள் சார்பில் ஐகோர்ட்டில் வழக்கு தொடுக்கப்பட்டது. இதில், ஆக்கிரமிப்புகளை அகற்றவும், நிலுவை வாடகை செலுத்தவும், முறையாக டெண்டர் விடவும் சமீபத்தில் ஐகோர்ட் உத்தரவிட்டது. தொடர்ந்து, பர்லியார் ஊராட்சி சார்பில், நிலுவை தொகை செலுத்தவும், கடைகளை காலி செய்யவும் கடந்த, 19ல் இதற்கான நோட்டீஸ் வியாபாரிகளுக்கு வழங்கப்பட்டது. கால அவகாசம் முடிந்த நிலையில், ஊராட்சி ஒன்றிய வட்டார வளர்ச்சி அலுவலர் சந்திரசேகரன், ஊராட்சி செயலாளர் இந்துமதி ஆகியோர் நேற்று ஆய்வுக்கு வந்து தாங்களா கவே அகற்ற கூறினர். அப்போது வியாபாரிகள் கூறுகையில், 'பணம் படைத்தவர்களின் பல அடுக்கு கட்டடங்கள் மீதும், புதிதாக கடைகள் கட்ட உள்ளவர்களை தடுக்காமல் தங்களை மட்டும் அகற்ற கூறுவது நியாமில்லை. வாழ்வாதாரம் பாதிக்காமல் தற்காலிக கடைகள் அமைக்க நடவடிக்கை எடுக்கவும் வேண்டும். ஆக்கிரமிப்புகளை அகற்ற ஒத்துழைப்பு தரப்படும்,' என்றனர். அதிகாரிகள் கூறுகையில்,'மாவட்ட கலெக்டரிடம் தெரிவித்த பிறகு, அடுத்த கட்ட நடவடிக்கை எடுக்கப்படும்,' என்றனர்.