கோத்தகிரி நுாலகத்திற்கு நற்சான்று விருது

கோத்தகிரி: கோத்தகிரி நுாலகத்திற்கு நற்சான்று விருது வழங்கப்பட்டுள்ளது. மாநிலத்தில் உள்ள அனைத்து பகுதிகளிலும், ஆண்டுதோறும் தேசிய நுாலக வார விழா நடத்தப்படுகிறது. விழாவில், நாள்தோறும் கவியரங்கம், பட்டிமன்றம், கருத்தரங்கம், நுால் வெளியீடு, பள்ளி மாணவர்களுக்கு இலக்கிய போட்டிகள், பாரம்பரிய இசை மற்றும் நடனங்கள் நடத்தப்பட்டு விருதுகள் வழங்கப்படுவது வழக்கம். அதன்படி, வாசகர் வட்டம் என்ற அமைப்பை ஏற்படுத்தி, தமிழ்நாடு பண்பாட்டு கல்வி கலை வளர்ச்சி மேம்பாட்டுக்காக, சிறப்பாக செயல்படும் ஒரு நுாலகத்திற்கு விருது வழங்கப்படுகிறது. நடப்பாண்டு, சிறந்த வாசகர் வட்டம், சிறந்த நுாலக பராமரிப்பு, அரசு போட்டி தேர்வுகளுக்கான இலவச படிப்பக பயிற்சி, இணையதள வசதி மற்றும் கல்வியில் மாணவர்களை மேன்மை பெற செய்வது போன்ற பணிகளுக்காக, கோத்தகிரி நுாலக வாசகர் வட்டத்திற்கு பாராட்டு விருது வழங்கப்பட்டுள்ளது. சென்னையில் நடந்த விழாவில், தமிழ்நாடு அரசு பொது நுாலக துறை சார்பில், கோத்தகிரி நுாலக வாசகர் வட்ட தலைவர் கோபால், நுாலகர் அமுதா மற்றும் நுாலக உதவியாளர் மகாலட்சுமி பாபு ஆகியோருக்கு விருது வழங்கப்பட்டது. கோத்தகிரி நுாலக வாசகர் வட்டத்துக்கு, கலெக்டர் லட்சுமி பவ்யா மற்றும் மாவட்ட நுாலக அலுவலர் கிளமெண்ட் ஆகியோர் பாராட்டு தெரித்தனர்.