எஸ்.ஐ.ஆர்., பணியில் அதிகாரிகள் நேர்மையாக செயல்படுவதில்லை: ஊட்டியில் வேலுமணி குற்றச்சாட்டு

ஊட்டி: 'தி.மு.க.,வின் அழுத்தத்தால், எஸ்.ஐ.ஆர்., பணியில் அதிகாரிகள் நேர்மையாக செயல்படுவதில்லை,' என, வேலுமணி குற்றம் சாட்டினார். ஊட்டியில் அ.தி.மு.க., சார்பில், முகவர்கள் ஆலோசனைக் கூட்டம் நடந்தது. கூட்டத்தில் பங்கேற்ற அ.தி.மு.க., தலைமை நிலைய செயலாளர் வேலுமணி, முகவர்களுக்கு ஆலோசனை வழங்கினார். தொடர்ந்து, நிருபர்களிடம் அவர் கூறுகையில், ''ஊட்டி, குன்னுார் மற்றும் கூடலுார் ஆகிய மூன்று தொகுதிகளிலும் எஸ்.ஐ.ஆர்., குறித்து, வரும் இரு நாட்கள் சிறப்பு முகாம் நடக்கிறது. தகுதியான வாக்காளர்களை சேர்ப்பதுடன், போலி வாக்காளர்களை நீக்க வேண்டும். இந்த மூன்று சட்டசபை தொகுதி உட்பட, மாநிலம் முழுவதும் உள்ள மக்கள், மீண்டும் பழனிசாமி முதல்வராக வேண்டும் என்பதை முடிவு செய்துவிட்டனர். மீண்டும் அ.தி.மு.க., ஆட்சி அமையும். எஸ்.ஐ.ஆர்., பணியில், தி.மு.க.,வின் அழுத்தத்தால், அரசு அதிகாரிகள் நேர்மையாக செயல்படுவதில்லை,'' என்றார். மாவட்ட செயலாளர் வினோத், முன்னாள் அமைச்சர் வேலுச்சாமி உட்பட பலர் பங்கேற்றனர்.