அரசு பஸ்களில் ஊர்களின் பெயர் தெரியாமல் பயணிகள் குழப்பம்

பந்தலுார்: கூடலுார் பகுதிகளில் இருந்து இயக்கப்படும், அரசு பஸ்களில் ஊர்களின் பெயர் தெரியாத வகையில், பஸ்கள் இயக்கப்பட்டு வருவது பயணிகளை குழப்பம் அடைய செய்துள்ளது. கூடலுார் மற்றும் பந்தலுார் பகுதிகளுக்கு அரசு போக்குவரத்து கழகத்தின், கூடலுார் கிளையில் இருந்து அரசு பஸ்கள் இயக்கப்பட்டு வருகின்றன. கடந்த காலங்களில் ஊர்களில் பெயர்கள், பலகைகளில் எழுதி, பயணிகள் பார்வைக்கு தெரியும் வகையில் வைக்கப்பட்டு இருக்கும். ஆனால், தற்போது பஸ்கள் அனைத்தும் நவீன மயமாக மாறியதால், பஸ்களில் அறிவிப்பு பலகைகள் டிஜிட்டலுக்கு மாறியது. ஆரம்ப காலங்களில் அனைத்து பஸ்களிலும் முறையாக ஊர்களின் பெயர் விபரங்கள், டிஜிட்டலில் இருந்தது. ஆனால், தொடர்ச்சியாக இயக்கப்பட்ட இந்த பஸ்கள் பழுதடைந்த நிலையில், டிஜிட்டல் அறிவிப்பு பலகைகளும் செயல் இழந்து வருகின்றன. சில பஸ்களில் ஊர்களின் பெயர்கள் சரியாக இல்லாததால் பயணிகள் குழப்பம் அடைகின்றனர். சில பஸ்களில் பலகை இருந்த இடத்தில், பலகைகளில் பெயர் எழுதி தொங்கவிடப்பட்டு உள்ளது. இவை பயணிகளின் கண்களுக்கு சரியாக தெரியாத நிலையில், ஊர்களின் பெயர் தெரியாமல் நிற்கும் நிலை ஏற்படுகிறது. பயணிகள் கூறுகையில், 'டிஜிட்டல் எழுத்து வரும் பகுதியில், ஊர்களின் அறிவிப்பு பலகைகளை முறையாக பராமரித்து, பயணிகளின் பார்வைக்கு தெரியும் வகையில் இயக்க வேண்டும்,' என்றனர்.