காமராஜர் சாகர் அணையில் ஆகாய தாமரை தண்ணீர் தேக்கி வைப்பதில் சிக்கல்

ஊட்டி: ஊட்டி அருகே காமராஜர் சாகர் அணையில் தேக்கி வைக்கப்படும் தண்ணீர் மாயார், சிங்காரா மின் நிலையத்தின், மின் தேவையை பூர்த்தி செய்வதுடன், வறட்சி காலங்களில் வனவிலங்குகளின் தண்ணீர் தேவையை தீர்த்து வைக்கிறது. நடப்பாண்டில் பெய்த பருவ மழைக்கு அணை முழு கொள்ளளவை எட்டி உள்ளது. கோடையில் இந்த தண்ணீர் மசினகுடி, முது மலைக்கு பெரும் பயனுள்ளதாக அமையும். இந்நிலையில், அணையின் கரையோர பகுதிகளில் அதிகளவில் ஆகாயத்தாமரை வளர்ந்திருப்பதால் தண்ணீர் தேக்கி வைப்பதில் சிக்கல் ஏற்பட்டுள்ளது. இந்த ஆகாய தாமரையால் வறட்சி சமயங்களில் தண்ணீர் வெகுவாக குறைய வாய்ப்புள்ளது. மக்கள் கூறுகையில், 'மின்வாரியம் உடனடியாக ஆய்வு மேற்கொண்டு கரையோரம் வளர்ந்துள்ள ஆகாய தாமரையை அகற்றினால் மட்டுமே மின் உற்பத்திக்கும், வன விலங்குகள் தேவைக்கும் இந்த தண்ணீரை பயன்படுத்த முடியும்,' என்றனர்.