காலிபாட்டில் வைக்கப்படும் பகுதி: காலையிலும் கிடைக்குது கட்டிங்

பந்தலுார்: பந்தலுார் அருகே உள்ள உப்பட்டி பஜார் பகுதி, 20-க்கும் மேற்பட்ட கிராமங்கள் மற்றும் பல்வேறு பகுதிகளைச் சேர்ந்த மக்கள் சந்திக்கும் பகுதியாக உள்ளது. இந்த பகுதியில் குடியிருப்புகளை ஒட்டி டாஸ்மாக் மதுக்கடை செயல்பட்டு வருகிறது. மதுக்கடையை ஒட்டி டாஸ்மாக் 'பார்' செயல்பட்டு வரும் நிலையில், இங்கு காலை முதல் 'கட்டிங்' விற்பனை கன ஜோராக நடந்து வருகிறது. இதனால், காலையில் பணிக்கு செல்லும் பலரும், சரக்கு அடித்து விட்டு வேலைக்கு செல்லாமல் முடங்கும் அவலம் தொடர்கிறது. பல்வேறு கிராமங்களுக்கு செல்லும் சாலை இதனை ஒட்டி அமைந்துள்ள நிலையில், இளைய தலைமுறையினர் பாதிக்கப்படும் சூழல் உருவாகி உள்ளது. பொது மக்கள் கூறுகையில்,'தேவாலா ஸ்டேஷன் போலீசாருக்கு, பலமுறை தகவல் கொடுத்தும் இதுவரை நடவடிக்கை எடுக்கவில்லை. எனவே, காலை நேரத்தில் இங்கு இயங்கும் 'பார்' உரிமத்தை ரத்து செய்ய உரிய நடவடிக்கை எடுக்க கோரி, மாவட்ட கலெக்டரிடம் புகார் மனு கொடுத்துள்ளோம்,' என்றனர்.