தப்பிய போக்சோ கைதி கேரளாவில் கைது

பெரம்பலுார்: பெரம்பலுார் மாவட்டம், ஓலைப்பாடி கிராமத்தை சேர்ந்தவர் வெங்கடாசலம் மகன் வாஞ்சிநாதன், 30. இவர், 2022 ஏப்., 8ம் தேதி இதே பகுதியை சேர்ந்த 17 வயது சிறுமிக்கு பாலியல் தொந்தரவு கொடுத்துவிட்டு தலைமறைவானார். சிறுமியின் தாய் புகாரில், மங்கலமேடு அனைத்து மகளிர் போலீசார், வாஞ்சிநாதன் மீது போக்சோ வழக்கு பதிந்தனர். தலைமறைவாக இருந்த வாஞ்சிநாதனை பிடிக்க நீதிமன்றம் பிடிவாரன்ட் பிறப்பித்தது. கன்னியாகுமரி மாவட்டம், நாகர்கோவிலில் தலைமறைவாக இருந்த வாஞ்சிநாதனை அக்., 18ம் தேதி போலீசார் கைது செய்து, பெரம்பலுார் கிளை சிறையில் அடைத்தனர். இந்நிலையில், நவ., 24ம் தேதி வாஞ்சிநாதனை, பெரம்பலுார் கிளை சிறையிலிருந்து, போலீசார் சூரியகுமார், பிரேமா ஆகிய இருவரும் அழைத்து சென்று, பெரம்பலுார் மகிளா நீதிமன்றத்தில் ஆஜர்படுத்திவிட்டு, மீண்டும் சிறைக்கு அழைத்து வந்தபோது, பெரம்பலுார் பழைய பஸ் ஸ்டாண்ட் அருகே வாஞ்சிநாதன் தப்பினார். தனிப்படை போலீசார் கேரள மாநிலம், பாலக்காடு பகுதியில் பதுங்கி இருந்த வாஞ்சிநாதனை, நேற்று முன்தினம் கைது செய்து, பெரம்பலுார் அழைத்து வந்து நீதிமன்றத்தில் ஆஜர்படுத்தி சிறையில் அடைத்தனர்.