கூராங்கோட்டை வழியாக கமுதிக்கு பஸ் வசதி இல்லை 10 கிராம மக்கள் அவதி

சாயல்குடி: சாயல்குடியில் இருந்து கூராங்கோட்டை வழியாக தொடர்ச்சியாக செல்லக்கூடிய 10 கிராமங்களுக்கு வழித்தடம் இருந்தும், தற்போது வரை பஸ் வசதி இல்லாததால் வாடகை வாகனங்களில் பயணம் செய்து மக்கள் சிரமப்படுகின்றனர். சாயல்குடியில் இருந்து 7 கி.மீ., தொலைவில் உள்ள கூராங்கோட்டை தர்ம முனிஸ்வரர் கோயிலுக்கு நாள்தோறும் விசேஷ தினங்களில் ஏராளமான பக்தர்கள் வருகின்றனர். கூராங்கோட்டை உள்ளிட்ட 10 கிராமங்களின் வழியாக கமுதி செல்லக்கூடிய வழித்தடத்தில் பஸ்கள் பல ஆண்டுகளாக இல்லாத நிலையில் கிராம மக்கள் சிரமப்படுகின்றனர். பா.ஜ., மாவட்ட துணைத்தலைவர் சாயல்குடியை சேர்ந்த கோபாலகிருஷ்ணன் கூறியதாவது: சாயல்குடியில் இருந்து கூராங்கோட்டை, மணிவலை, வேடக்கரிசல்குளம், அல்லிக்குளம், வெள்ளம்பல் வழியாக கோவிலாங்குளம் மற்றும் கமுதி செல்வதற்கு வழித்தடம் உள்ளது. பஸ் வழித்தடம் செல்வதற்கு ஏற்ற வகையில் சாலை புதிதாக அமைக்கப்பட்டுள்ளது. அவற்றில் பல ஆண்டுகளாக அரசு டவுன் பஸ்கள் இயக்கப் படாததால் பள்ளி கல்லுாரிகள் மற்றும் வேலைக்குச் செல்லக் கூடிய பொதுமக்கள் வாடகை வாகனங்களில் கூடுதல் கட்டணம் செலுத்தி செல்கின்றனர். முதுகுளத்துார் அரசு போக்குவரத்து பணிமனையின் சார்பில் காலை, மதியம், மாலை நேரங்களில் மீண்டும் அதே வழித்தடத்தில் அரசு டவுன் பஸ் இயக்கிடுவதற்கு நடவடிக்கை எடுக்க வேண்டும். தேர்தல் காலங்களில் வாக்குறுதியாகவே உள்ளது. இன்னும் நிறைவேற்றப் படவில்லை என்றார்.