பரமக்குடியில் டிச.3 முதல் 80 நெசவாளர் கூட்டுறவு சங்கங்கள் வேலை நிறுத்தம்

கைத்தறி உதவி இயக்குநரை மாற்ற வலியுறுத்தல்பரமக்குடி: ராமநாதபுரம் மாவட்டம் பரமக்குடி சரக உதவி கைத்தறி உதவி இயக்குநரை மாற்ற வலியுறுத்தி, டிச., 3 முதல் கூட்டுறவு சங்கங்கள் இயங்காது என, பணியாளர்கள் மற்றும் பெடரேஷன் சார்பில் தெரிவிக்கப்பட்டுள்ளது. இதனால் 80க்கும் மேற்பட்ட சங்கங்களை சேர்ந்த பல ஆயிரம் நெசவாளர்கள் வாழ்வாதாரம் பாதிக்கப்படும் அபாயம் உள்ளது. பரமக்குடி, எமனேஸ்வரம் கூட்டுறவு சங்கங்களின் பணியாளர் சங்கம், பரமக்குடி, எமனேஸ்வரம் கைத்தறி நெசவாளர் கூட்டுறவு சங்கங்களின் உறுப்பினர்களின் பெடரேஷன் சார்பில் எமனேஸ்வரத்தில் கூட்டம் நடந்தது. பெடரேஷன் தலைவர் சேசைய்யன் தலைமை வகித்தார். பரமக்குடி சரக கைத்தறி உதவி இயக்குநர் சேரன் மீது பல்வேறு புகார்களை சங்கத்தினர் கூறினர். அவரை உடனடியாக பணியிட மாற்றம் செய்யகோரி டிச., 3 ம் தேதி முதல் இப்பகுதி கைத்தறி கூட்டுறவு சங்கங்கள் வேலைநிறுத்தம் செய்வது என தீர்மானம் நிறைவேற்றப்பட்டது. பரமக்குடி, எமனேஸ்வரம் பகுதியில் 80க்கும் மேற்பட்ட கூட்டுறவு நெசவாளர் சங்கங்களில் பல ஆயிரம் பேர் கச்சா பொருள் பெற்று தொழில் செய்கின்றனர். இவர்கள் காட்டன், பம்பர் என சேலை ரகங்களை உருவாக்கி வருகின்றனர். தொடர்ந்து சங்கங்கள் ரிபேட் பாக்கி, நெய்யப்பட்ட சேலைகளை விற்பனை செய்ய முடியாமல் தவிக்கின்றன. வேலைநிறுத்தம் காரணமாக சங்கங்கள் முடங்கும் அபாயம் ஏற்பட்டுள்ளது. இதனால் பல கோடி ரூபாய் வர்த்தகம் பாதிக்க வாய்ப்புள்ளது.