மீனவர்கள் கடலுக்கு செல்வதை தடுக்க மீன்வளத்துறையினர் கண்காணிப்பு

தேவிபட்டினம்: கிழக்கு கடற்கரை மீனவர்கள் தடையை மீறி கடலுக்கு செல்வதை தடுக்கும் விதமாக, மீனவ கிராம பகுதிகள் மற்றும் கடற்கரைப் பகுதிகளில் மீன்வளத்துறை அதிகாரிகள் கண்காணிப்பை தீவிரப் படுத்தி உள்ளனர். வங்கக் கடலில் நிலை கொண்டுள்ள காற்றழுத்த தாழ்வு நிலையால், கடந்த மூன்று தினங்களாக கடலோரப் பகுதிகளில் மழை பெய்து வருகிறது. அதே நேரத்தில் வங்கக் கடல் சீற்றம் காரணமாக, நாட்டு படகு மற்றும் விசைப்படகு மீனவர்கள் கடலுக்கு மீன் பிடிக்க செல்ல தடை விதிக்கப்பட்டுள்ளது. இருப்பினும் சில மீனவர்கள் கடலுக்குள் மீன் பிடிக்க சென்று வருகின்றனர். நவ. 27 முதல் கிழக்கு கடற்கரை பகுதி தேவி பட்டினம் முதல் ஆற்றங்கரை வரை மீன்வளத்துறை உதவி இயக்குநர் ராஜேந்திரன் உத்தரவின் பேரில், மீன்வளத்துறை சார்பு ஆய்வாளர் அய்யனார் தலைமையில் மீன்வளத்துறை மேற்பார்வையாளர் சரத் மோகன், கடல் அமலாக்க பிரிவு போலீசார் காதர் இப்ராஹிம் உள்ளிட்ட பல்வேறு குழுக்களாக கண்காணிப்பை தீவிரப் படுத்தி உள்ளனர். கடல் பகுதியில் நிலை வரும் கடல் சீற்றம் குறித்தும் அதனால் ஏற்படும் பாதிப்புகள் குறித்தும் மீனவ கிராமங்களில் மீனவர்களுக்கு விழிப்புணர்வு ஏற்படுத்தும் முயற்சிகளும் அதிகாரிகள் ஈடுபட்டுள்ளனர். தடையை மீறி கடலுக்கு செல்லும் மீனவர்கள் மீது கடுமையான நடவடிக்கை எடுக்கப்படும் எனவும் அதிகாரிகள் எச்சரித்தனர்.

ஆபத்தை உணராமல்

கடலில் குளிக்கும் சிறுவர்கள்

திருவாடானை: புயல் எச்சரிக்கை அறிவிக்கபட்டும் ஆபத்தை உணராமல் தொண்டி கடலில் சிறுவர்கள் குளிக்கின்றனர். புயல் காரணமாக சில நாட்களுக்கு முன்பு கடல் நீர் மட்டம் உயர்ந்து புதுக்குடி கடற்கரை ஓரமாக இருந்த வீடுகளை கடல் நீர் சூழ்ந்தது. இரு நாட்களுக்கு முன்பு தொண்டி மரைன் போலீஸ்ஸ்டேஷனையும் கடல் நீர் சூழ்ந்தது. பலத்த காற்றுக்கு கடல் அலையால் 10க்கும் மேற்பட்ட படகுகள் சேதமடைந்தன. கடல் சீற்றமாகவும் உள்ளது. கடற்கரையிலிருந்து 50 மீட்டர் தொலைவில் நீரோற்றம் உருவானதால் கடல் அலையில் சிக்கி நம்புதாளையில் வாலிபர் இறந்தார். கடலில் ஆபத்தை உணராமல் சிறுவர்கள் குளிக்கின்றனர். பெற்றோர்கள் தங்கள் குழந்தைகளை பாதுகாக்க கண்காணிக்க வேண்டும் என்றனர்.