மழைக்காலங்களில் அச்சத்திற்குள்ளாகும் கடலாடி வேளாண்மை துறை அலுவலர்கள் புதிய கட்டடத்திற்கு எதிர்பார்ப்பு

கடலாடி: கடலாடி யூனியன் அலுவலக வளாகத்தில் வேளாண்மை துறை அலுவலகம் இயங்கி வருகிறது. கடலாடி வட்டாரத்திற்கு உட்பட்ட 42 வருவாய் கிராமங்களில் இருந்து அலுவலக வேலை நாட்களில் விவசாயிகள் வேளாண்மை உதவி இயக்குநர் அலுவலகத்திற்கு வருகின்றனர். 1961ல் கட்டப்பட்ட பழமையான கட்டடத்தில் தற்போது வரை வேளாண்மை அலுவலகம் இயங்கி வரும் நிலையில், கட்டடத்தின் கூரை பூச்சு அடிக்கடி பெயர்ந்து விழுகிறது. வேளாண்மை உதவி இயக்குநர், அட்மா தொழில்நுட்ப மேலாளர்கள் உள்ளிட்ட 7க்கும் மேற்பட்ட அலுவலர்கள் பணி புரிந்து வரும் நிலையில் இட நெருக்கடியால் சிரமப்பட்டு வருகின்றனர். மாவட்டத்தில் திருப்புல்லாணி, ஆர்.எஸ். மங்கலம் உள்ளிட்ட பல இடங்களில் வேளாண்மை துறையின் சார்பில் புதிய கட்டுமான வசதிகளுடன் அலுவலகம் இயங்கி வரும் நிலையில் கடலாடி வேளாண்மை துறை அலுவலகத்திற்கு புதிய கட்டடம் ஏதுமின்றி சேதமடைந்த கட்டடத்தில் அடிப்படை வசதி இருந்து இயங்கி வருவது, அலுவலர்களுக்கும் விவசாயிகளுக்கும் அச்சத்தை ஏற்படுத்தி வருகிறது. விவசாயிகள் கூறியதாவது: மழைக்காலங்களில் அலுவலகத்தில் மேல் தளம் மற்றும் பக்கவாட்டுச் சுவர்களில் தண்ணீர் வழிந்து ஓடுகிறது. அடிக்கடி சிமென்ட் பூச்சுகள் உதிர்ந்து விழுகிறது. புதிய கட்டடம் கட்டுவதற்கான டெண்டர் விடப்படும் இதுவரை அதற்கான பணிகள் மேற்கொள்ளப்படாமல் ஆமை வேகத்தில் உள்ளது. எனவே வேளாண்மை துறை உயர் அதிகாரிகள் இதற்கு முயற்சி எடுக்க வேண்டும் என்றனர்.