ராமேஸ்வரம் அருகே கடல் அலையால் ரோடு சேதம்: ரூ. 66 லட்சம் வீண்

ராமேஸ்வரம்: -: ராமேஸ்வரம் அருகே மண்டபம் கடலோரத்தில் அலைகளால் சாலை முழுவதும் சேதமடைந்தது. இதனால் ரூ. 66 லட்சம் வீணாகியது. மண்டபம் பேரூராட்சி தோணித்துறை மாதா கோயில் அருகே மீனவ குடும்பத்தினர் வசிக்கின்றனர். இங்குள்ள மீனவர்களுக்கு சாலை வசதி இல்லாததால் பேரூராட்சி நிர்வாகம் சில மாதங்களுக்கு முன்பு ரூ. 66 லட்சம் செலவில் கடலோரத்தில் தார்சாலை அமைத்தது. இச்சாலை பாதுகாக்க கடலோரத்தில் பாறாங்கல் தடுப்பு வேலி அமைக்க மீனவர்கள் கோரிக்கை விடுத்தனர். ஆனால் மாவட்ட நிர்வாகம் கண்டு கொள்ளவில்லை. இரு நாட்களாக சூறாவளி காற்று வீசி ராட்சத அலை எழுந்து, இச்சாலை மீது ஆக்ரோஷமாக மோதி அரிப்பு ஏற்படுத்தியது. மீனவர்கள் டூவீலரில் செல்ல முடியாதபடி சாலை முழுவதும் சேதமடைந்தது. இந்த சாலை பாதுகாக்க பாறாங்கல் தடுப்பு வேலி அமைக்க தமிழக அரசு முன்வராததால் மக்கள் வரிப்பணம் ரூ. 66 லட்சம் வீணாகியது.