போலீஸ் ஸ்டேஷன் நுழைவு வாயிலில் தேங்கும் கழிவுநீர்: தவிக்கும் போலீசார்

பரமக்குடி: பரமக்குடி போலீஸ் ஸ்டேஷன் வாயிலில் மழை நீருடன் கழிவு நீர் தேங்கியிருப்பதால் கொசுத் தொல்லையால் போலீசார் பாதிக்கப்படுகின்றனர். பரமக்குடி ஒருங்கிணைந்த போலீஸ் ஸ்டேஷன் வளாகத்தில் டவுன், தாலுகா, மகளிர் மற்றும் போக்குவரத்து போலீஸ் ஸ்டேஷன்கள் செயல்படுகிறது. இதனால் நுாறுக்கும் மேற்பட்ட போலீசார் தினம் தினம் இங்கு பணி செய்கின்றனர். அனைத்து வகையான பிரச்னைகள் மற்றும் குற்றங்களுக்கு தீர்வு காண மக்கள் வந்து செல்கின்றனர். இந்நிலையில் ஸ்டேஷன் முன்பு அமைக்கப்பட்ட ரோடு பள்ளமாக இருப்பதால் நாள் கணக்கில் கழிவுநீர் தேங்குகிறது. மேலும் மழை பெய்யும் நாட்களில் ஒட்டுமொத்த வளாகத்திலும் தண்ணீர் சூழ்வதால் சீருடையுடன் செல்லும் போலீசார் சிரமத்திற்கு உள்ளாகின்றனர். இரவு நேரத்தில் மட்டுமல்லாது நாள் முழுவதும் கொசுத் தொல்லையால் அவதி அடைகின்றனர். இதனால் போலீசார் தோல் அரிப்பு மற்றும் தொற்று நோயால் பாதிக்கப்பட்டுள்ளனர். எனவே ஒவ்வொரு நாளும் மக்கள் பிரச்னைகளை தீர்க்கும் போலீசார் மன உளைச்சல் இன்றி பணி செய்ய பொதுப்பணித்துறை அதிகாரிகள் ஸ்டேஷன் வளாகத்தை சீரமைக்க நடவடிக்கை எடுக்க வேண்டும் என கோரிக்கை விடுத்துள்ளனர்.