பரமக்குடி, மதுரை வழித்தடத்தில் அதிகரிக்கும் வாகன விபத்துக்கள்

பரமக்குடி: பரமக்குடி, மதுரை வழித்தடத்தில் விபத்துக்கள் அதிகரிப்பதால் தனியார் பஸ்களுக்கும் வேகக்கட்டுப்பாடு ஏற்படுத்த வேண்டும் என பயணிகள் கோரிக்கை விடுத்துள்ளனர். வணிக நகராக விளங்கும் பரமக்குடிக்கு ஏராளமான வியாபாரிகள் வந்து செல்லும் நிலை உள்ளது. இதே போல் அனைத்து வகையான பொருட்களின் விற்பனை சந்தையாக விளங்கும் மதுரைக்கு நாள் தோறும் பலர் சென்று வருகின்றனர். பணி நிமித்தமாக பஸ்களை பயன்படுத்துவோரும் அதிகளவில் உள்ளனர். பரமக்குடியில் இருந்து மதுரை செல்ல ஒன்றரை மணி நேரத்திலிருந்து 2:00 மணி நேரம் வரை ஆகிறது. ஆனால் தனியார் பஸ்களில் வேக கட்டுப்பாடு இல்லாத சூழலில் 15 நிமிடங்களுக்கு முன்னதாகவே செல்லும் நிலை இருக்கிறது. மேலும் பஸ்களில் அதிக சத்தத்துடன் ஸ்பீக்கர்களை அலற விடுகின்றனர். இதுகுறித்து பயணிகள் தெரிவித்தாலும் எந்த அக்கறையும் கொள்வதில்லை. இதனால் குழந்தைகள், முதியவர்கள் உள்ளிட்ட உடல் நலம் பாதித்தவர்கள் பஸ்களில் ஏறும்போது மிகுந்த சிரமத்திற்கு உள்ளாகின்றனர். ஆகவே அரசு பஸ்களில் உள்ளதை போன்று தனியார் பஸ்களிலும் வேகக் கட்டுப்பாடு மற்றும் பயணிகளுக்கு சிரமம் இல்லாத போக்குவரத்தை அதிகாரிகள் உறுதி செய்ய வேண்டும்.