வாழ்விட பகுதி அசுத்தமாக உள்ளதால் பெண் கேட்க கூட யாரும் வருவதில்லை

ஆத்துார், ''எங்கள் வாழ்விட பகுதி முழுதும் அசுத்தமாக உள்ளதால், இப்பகுதியில் திருமணத்துக்கு பெண் கேட்க கூட யாரும் வருவதில்லை,'' என, தி.மு.க., கவுன்சிலர் சந்திரா பேசினார்.சேலம் மாவட்டம் ஆத்துார் நகராட்சி கவுன்சிலர் கூட்டம், நேற்று நடந்தது. தி.மு.க.,வை சேர்ந்த, தலைவி நிர்மலாபபிதா தலைமை வகித்தார். அதில் நடந்த விவாதம் வருமாறு:அ.தி.மு.க., கவுன்சிலர் வரதராஜ்: வார்டில் இதுவரை, 3 லட்சம் ரூபாய்க்கு தான் பணி நடந்துள்ளது. இதுகுறித்து கேட்டால் திட்ட மதிப்பீடு தயாரிப்பதாக கூறுகிறீர்கள். 3 மாதங்களில், சட்டசபை தேர்தல் வந்துவிட்டால் எந்த பணியும் செய்ய முடியாது.கமிஷனர் சையது முஸ்தபா கமால்: ஆய்வு செய்து நடவடிக்கை எடுக்கப்படும்.தொடர்ந்து, அ.தி.மு.க., கவுன்சிலர்கள் வரதராஜ், ராஜேஷ்குமார், மணி, கலைச்செல்வி, உமாசங்கரி ஆகியோர், '3 அடிப்படை பணிகள் எழுதி கொடுத்தும் தீர்மானமாக வரவில்லை' என கூறி வெளிநடப்பு செய்தனர்.காங்., கவுன்சிலர் தேவேந்திரன்: ஆத்துார் நகரில், பிற மாநிலத்தவர்கள் ஓட்டுகளை, தற்போது சேர்த்து வருவதாக கூறுகின்றனர். கமிஷனர்: விசாரிக்கப்படும்.தொடர்ந்து தேவேந்திரன், எஸ்.ஐ.ஆரை கண்டித்து, பதாகை ஏந்தியபடி வெளி நடப்பு செய்தார். தி.மு.க., கவுன்சிலர் யசோதா: மழை காலம் என்பதால் சாக்கடையை துார்வார வேண்டும். கொசுக்கள் அதிகம் உள்ளதால் மருந்து அடிக்க வேண்டும்.கமிஷனர்: நடவடிக்கை எடுக்கப்படும்.தி.மு.க., கவுன்சிலர் சந்திரா: 30வது வார்டில் நாய் தொல்லை அதிகமாக உள்ளது. தவிர எங்கள் வாழ்விட பகுதி முழுதும் அசுத்தமாக உள்ளதால், இப்பகுதியில் திருமணத்துக்கு பெண் கேட்க கூட யாரும் வருவதில்லை.கமிஷனர்: சுகாதார பணிக்கு நடவடிக்கை எடுக்கப்படும்.இவ்வாறு விவாதம் நடந்தது.நியமன உறுப்பினரால் சர்ச்சைமாற்றுத்திறனாளி நியமன உறுப்பினரான பாபு, கவுன்சிலர்களுடன், கடைசி வரிசையில் அமர வைக்கப்பட்டார். தவிர, தி.மு.க., கட்சி துண்டு அணிந்திருந்தார். கட்சி சாராத மாற்றுத்திறனாளியை, நியமன உறுப்பினராக தேர்வு செய்ய அரசு உத்தரவிட்டிருந்தது. ஆனால் பாபு, தி.மு.க., கட்சி துண்டு அணிந்து வந்தது, அவரை கடைசி இருக்கையில் அமரவைத்தது, சர்ச்சையை ஏற்படுத்தியது.