போதை மாத்திரை விற்ற சிறை காவலர் சிக்கினார்

சேலம்: கைதிகளுக்கு போதை மாத்திரை விற்ற போலீஸ்காரர் சஸ்பெண்ட் செய்யப்பட்டு, கைது செய்யப்பட்டார். சேலம் மத்திய சிறையில், இரண்டாம் நிலை காவலராக பணியாற்றியவர் நாமக்கல் மாவட்டம், மோகனுாரை சேர்ந்த செல்வராசு, 34. இவர் கைதிகளுடன் நெருக்கமாக இருந்து, சட்ட விரோத செயல்களில் ஈடுபட்டு, லட்சக்கணக்கில் வருவாய் ஈட்டுவதாக புகார் வந்தது. நேற்று மதியம், 1:00 மணிக்கு பணி முடிந்து சென்ற போது, அவரது பையை, சிறை போலீசார் சோதனை செய்ததில், மூன்று மொபைல் போன், ஒரு சிம்கார்டு, 80 கிராம் கஞ்சா, 50 கிராம் புகையிலை, 50 போதை மாத்திரை, மூன்று போதை தாள் ஆகியவை சிக்கின. விசாரணையில், கைதிகளுக்கு விற்க கொண்டு வந்தது தெரியவந்தது. அஸ்தம்பட்டி போலீசார் செல்வராசுவை கைது செய்தனர். அவரை, 'சஸ்பெண்ட்' செய்து சிறை எஸ்.பி., வினோத்குமார் உத்தரவிட்டார்.