ஏரி நிலத்தை மீட்டுத்தரக்கோரி வி.ஏ.ஓ., அலுவலகம் முற்றுகை

தலைவாசல், தலைவாசல், இலுப்பநத்தம் ஊராட்சி நாட்டார் அக்ராஹாரத்தில், 100க்கும் மேற்பட்ட குடியிருப்புகள் உள்ளன. அப்பகுதி மக்களுக்கு குடிநீர், விவசாய நிலத்துக்கு பாசன ஆதாரமாக, 20 ஏக்கரில் ஏரி உள்ளது. ஏரி, அதன் நிலப்பகுதியில், 2024க்கு பின், தனி நபர்களுக்கு கிரயம் செய்ய, வருவாய்த்துறையினர் தடையில்லா சான்றிதழ் வழங்கியுள்ளனர்.இதனால் வருவாய்த்துறையினர் மீது நடவடிக்கை எடுக்கக்கோரி, முதல்வரின் தனிப்பிரிவு, சேலம் கலெக்டர், ஆத்துார் ஆர்.டி.ஓ., உள்ளிட்ட அதிகாரிகளுக்கு மனு அளித்தும் தீர்வு காணப்படவில்லை.இந்நிலையில் நேற்று, 100க்கும் மேற்பட்ட விவசாயிகள், ஆக்கிரமிப்புகளை அகற்றி, ஏரியை பயன்பாட்டுக்கு கொண்டு வரக்கோரி, வி.ஏ.ஓ., அலுவலகத்தை முற்றுகையிட்டனர். மேலும் வருவாய்த்துறையினரை கண்டித்து ஆர்ப்பாட்டத்தில் ஈடுபட்டனர். வீரகனுார் போலீசார், வருவாய்த்துறையினர் பேச்சு நடத்தி சமாதானப்படுத்தியதால், அனைவரும் கலைந்து சென்றனர்.