சிவகங்கையில் மாதத்திற்கு 1500 பேருக்கு நாய்க்கடி மருத்துவமனையில் சிகிச்சை

சிவகங்கை: மாவட்ட அளவில் நாய்கள் கடித்து மாதத்திற்கு 1,500 பேர் வரை ஏ.ஆர்.வி., (ஆன்ட்டி ரேபிஸ் வைரஸ்) தடுப்பூசி போடும் அளவிற்கு நாய்களின் எண்ணிக்கை அதிகரித்துள்ளது. சிவகங்கை மாவட்டத்தில் தெருக்கள் மற்றும் வீடுகளில் 46 ஆயிரத்து 796 நாய்கள் வளர்கின்றன. வீடுகளில் நாய்களை வளர்ப்போர் அவற்றிற்கு முறையாக தடுப்பூசி, பூச்சி மருந்துவழங்கி பாதுகாத்து வருகின்றனர். ஆனால், தெருக்களில் திரியும் நாய்கள், இறைச்சி கடைகளில் கொட்டப்படும் கழிவுகளை சாப்பிடுவதன் மூலம் அவற்றிற்கு வெறி பிடித்து விடுகின்றன. பெரும்பாலான நாய்கள் தோல் நோய் பாதிப்பிற்கு உள்ளாகி இறக்கின்றன. இறைச்சி கழிவுகளை சாப்பிட்டும், வெறிபிடித்த நாய்கள், மனிதர்களை கடிப்பதின் மூலம் தடுப்பூசி போடாவிட்டால், விரைவில் ரேபிஸ் நோய் தாக்கி உயிரிழப்பிற்கு உள்ளாகி விடுகின்றனர். இதை தடுக்கும் நோக்கிலும், நாய்களை பாதுகாக்கும் விதத்திலும் வெறி நோய் தடுப்பூசி போடப்பட்டு வருகிறது. இதற்காக அந்தந்த உள்ளாட்சிகளில் நாய் பிடி வலை அமைத்து, அவற்றை பிடித்து கால்நடை டாக்டர்கள் தடுப்பூசி போட்டு வருகின்றனர்.

தொடரும் பாதிப்பு

இம்மாவட்டத்தில் தெரு மற்றும் வீட்டு நாய்கள் கடித்ததின் மூலம் ஆகஸ்ட் - 1,041, செப்டம்பர் - 1,376, அக்டோபர் - 1,523 பேர் வரை அரசு மருத்துவமனைகளில் ஏ.ஆர்.வி., தடுப்பூசி செலுத்தியுள்ளனர். நாய்கடித்த அன்றே கடி பட்ட இடத்தில் குளிர்ந்த நீரில், சோப்பு போட்டு சுத்தம் செய்து, அன்றைய தினமே தடுப்பூசி போட வேண்டும். தொடர்ந்து 4 ஊசிகள் வரை உரிய இடைவெளி விட்டு போட்டால் மட்டுமே 'ரேபிஸ்' நோய் தாக்குதலில் இருந்து தப்பிக்க முடியும்.