மழைநீர் கால்வாயாக மாறிய தார்ரோடு: கிராம மக்கள் அவதி

சிங்கம்புணரி: சிங்கம்புணரி அருகே கிராமங்களை இணைக்கும் முக்கிய தார்சாலை மழை நீர் கால்வாயாக மாறிப் போனதால் கிராம மக்கள் அவதிப்படுகின்றனர். இவ்வொன்றியத்தில் மல்லாக்கோட்டை ஊராட்சியில் இருந்து நைனாபட்டி வழியாக எருமைபட்டி செல்லும் தார் சாலை பல ஆண்டுகளுக்கு முன்பு போடப்பட்டது. மல்லாக்கோட்டை நான்கு ரோடு சந்திப்பிலிருந்து குடியிருப்பு வரை இச்சாலையின் நிலை மோசமாக உள்ளது. பெரிய பள்ளங்கள் உருவாகி மழைக்காலங்களில் மட்டுமல்லாமல் வருடம் முழுதும் தண்ணீர் குளம் போல் தேங்கி கிடக்கிறது. டூவீலரில் செல்பவர்கள் இச்சாலையில் விழுந்து காயமடைந்து செல்ல வேண்டிய நிலை ஏற்பட்டுள்ளது. மக்கள் பலமுறை முறையிட்டும் சீரமைக்க நடவடிக்கை இல்லை. உடனடியாக சாலை சீரமைக்க மக்கள் மீண்டும் வலியுறுத்தியுள்ளனர்