புயல் பாதிப்பை எதிர்கொள்ள அனைத்து துறையும் தயார் திருவள்ளூர் மாவட்ட கண்காணிப்பு அலுவலர் தகவல்

திருவள்ளூர்: ''புயல் பாதிப்பை எதிர்கொள்ள அனைத்து துறைகளும் ஒருங்கிணைந்து, மீட்பு பணி மற்றும் நிவாரண பணிகளை மேற்கொள்ள தயார் நிலையில் உள்ளன,'' என, மாவட்ட கண்காணிப்பு அலுவலர் தெரிவித்தார். மாவட்ட கண்காணிப்பு அலுவலர் மற்றும் தமிழ்நாடு மின்னணுவியல் கழக நிர்வாக இயக்குநர் கார்த்திகேயன், 'டிட்வா' புயல் பாதிப்பை எதிர்கொள்வது குறித்து, நேற்று திருவள்ளூர் கலெக்டர் பிரதாப்பிடம் ஆலோசனை நடத்தினார். பூண்டி நீர்த்தேக்கத்தில் இருந்து திறக்கப்படும் நீரின் அளவு குறித்து, அதி காரிகளிடம் கேட்டறிந்தார். பின், கார்த்திகேயன் கூறியதாவது: திருவள்ளூர் மாவட்டத்தில், புயலால் ஏற்படும் பாதிப்பை தவிர்க்க, பல்வேறு துறை அலுவலர்கள் ஒருங்கிணைப்போடு பல்வேறு முன்னேற்பாடுகளை செய்துள்ளனர். பூண்டி நீர்த்தேக்கத்தில், தற்போது 1,300 கனஅடி நீர் திறக்கப்பட்டுள்ளது. நீர்வரத்து 600 கன அடியாக உள்ளது. நீர்த்தேக்கத்தில் இருந்து தண்ணீர் திறக்கப்பட்டு, 15,000 - 18,000 கனஅடி வரை நீர் வெளியேற்றப்பட்டாலும், கீழுள்ள பகுதிகளுக்கு எவ்வித பாதிப்பும் ஏற்படாது. இருப்பினும், மழையால் பாதிப்பு ஏற்படாமல் இருக்க முன்னெச்சரிக்கை நடவடிக்கையை நீர்வளத்துறையினர் செய்து வருகின்றனர். சோழவரம், புழல், கொசஸ்தலையாறு மற்றும் செம்பரம்பாக்கம் உள்ளிட்ட பகுதிகளில், நீர்வளம், காவல் மற்றும் வருவாய் துறை அலுவலர்கள் தொடர் கண்காணிப்பு மேற்கொள்ள நடவடிக்கை எடுக்கப்பட்டுள்ளது. மேலும், பேரிடர் மீட்பு படை குழு, ஆவடியில் தங்க வைக்கப்பட்டுள்ளனர். தீயணைப்பு துறையினர் ஒன்பது குழுவாக தங்க வைக்கப்பட்டுள்ளனர். பழவேற்காடு பகுதியில் சிறப்பு கவனம் எடுத்து, மண்டல அலுவலர் தலைமையில் தனி குழுக்கள் அமைக்கப்பட்டுள்ளன. தேவையான இடங்களில் நிவாரண முகாம் அமைத்து, உணவு வழங்கவும் ஏற்பாடு செய்யப்பட்டுள்ளது. அனைத்து துறைகளும் ஒருங்கிணைந்து மீட்பு பணிகளையும், நிவாரண பணிகளையும் மேற்கொள்ள தயார் நிலையில் உள்ளன. இவ்வாறு அவர் கூறினார். உடன், கொசஸ்தலையாறு வடிநில கோட்டம் செயற்பொறியாளர் ராதாகிருஷ்ணன், ஊரக வளர்ச்சி முகமை திட்ட இயக்குநர் ஜெயகுமார் உள்ளிட்டோர் பங்கேற்றனர்.