ஆரம்பாக்கத்தில் கல்லால் அடித்து பூ வியாபாரி கொடூர கொலை

கும்மிடிப்பூண்டி: கும்மிடிப்பூண்டி அருகே பெண் ஒருவரை கல்லால் அடித்து கொலை செய்துவிட்டு தப்பிய கொலையாளிகளை போலீசார் தேடி வருகின்றனர். கும்மிடிப்பூண்டி அடுத்த ஆரம்பாக்கம், சின்னநத்தம் கிராமத்தைச் சேர்ந்தவர் தயாளன் மனைவி தனம், 42; பூ வியாபாரி. நேற்று மாலை, சுண்ணாம்புகுளம் பகுதிக்கு பூ விற்பனை செய்ய சென்றவர் வீடு திரும்பவில்லை. குடும்பத்தினர் அவரை தேடி வந்தனர். இந்நிலையில், அவரது கிராமத்திற்கு அருகில் உள்ள மாந்தோப்பில் தலை, முகம் கல்லால் தாக்கி பெண் ஒருவர் கொலை செய்யப்பட்டிருப்பதாக, ஆரம்பாக்கம் போலீசாருக்கு தகவல் கிடைத்தது. போலீசார் அங்கு சென்று விசாரணை மேற்கொண்டதில், பூ வியாபாரி தனம் என்பது தெரிந்தது. இதையடுத்து போலீசார், தனத்தின் உடலை பிரேத பரிசோதனைக்காக பொன்னேரி அரசு மருத்துவமனைக்கு அனுப்பினர். இதுகுறித்து வழக்கு பதிந்த போலீசார், கொலைக்கான காரணம் குறித்து விசாரித்து வருகின்றனர்.